Dinya de nika di metodê şerî estê. Yewin şero konvansîyonel o, diyin şero hîbrît o. Ma raver tenê qala şerê konvansîyonelî bikerê. Çekuya “konvansîyonel” yena zaf manayan. Warê leşkerî de na çekuye sey manaya “tradîsyonel” yena şuxilnayene. Yanî şero tradîsyonel vanê. Nê şerî de artêşê întîzaminî pêkewtiş kenê. Labelê mîyanê çekanê ke bi destê dewletan yenê şuxilnayene de çekê nukleerî çin ê.

Şero hîbrît, şerê konvansîyonelî ra çend hokan ra cîya beno. Çekuya “hîbrît” yena manayanê sey “têvereşte, têtewr”. Şerê hîbrîtî de safî pêkewtişo çekdar çin o. Mucadeleyo psîkolojîk, hêrişo sîber, lejê enerjî, ambargo, hêzê caardişî, kiştişê merdimanê dewlete zî estê. No pênamekerdiş reya verêne hetê Frank Hoffmanî ra serra 2007î de ame gurenayene. Hoffmanî no tabîr seba îfadekerdişê teknîk û taktîkanê Hîzbullahî gurenaybî. Ma zanê ke Hîzbullahî wextê şerê 2006î de vera Îsraîlî nê teknîk û taktîkî şuxilnayî. Tabîrê Hoffmanî nika dinya de warê zanistî de xeylê bale anjeno.

Şero hîbrît nê aşmanê peyênan de bitaybetî mabênê Rûsya û Ukrayna de qewimîyeno. Birastî şer tena mabênê înan de nê, mabênê blokê rojawanî û Rûsya de zî vakî beno. Hetêk ra artêşê întîzaminê wird hetan pêkewenê, hetekê bînî ra metodê bînî şuxilîyenê. Nê şerî esasî serra 2014î de destpêkerdbî. Ê tarîx ra nat ma çimdarîya metodanê cîyayan kenê. Serekkomarê Ukrayna Vîktor Yanukovîç o wext bi destê hêzanê ke welatanê rojawanî ra çeke girewtbî ame wezîfe ra girewtene. No hewldayîşê rojawanî çimê Rûsya de derbeyêke bî. Çike Yanukovîçî bê weçînitişî wezîfeyê ci caverda.

Ukrayna Seba Rûsya her tim kolonî ya. Wazena ke no kolonî mekewo destê kolonyalkerdoxanê bînan. Nê semedî ra serê herdê Ukrayna de şerê hêzanê serdestan yeno ca. Hukmatê ke Ukrayna de şarî îdare kenê qet xoser nêbîyî. Yan “factotumê” Rûsya yan zî Amerîka bîyî. Key ke îdareyê Ukrayna binê destê Rûsya ra vejîya, nêrazîbîyayîşê rûsan zî zaf giran bî. Vera şîyayîşê Yanukovîçî raver Kirim bi destê Rûsya ame destsernayene. Bado îşxalkerdişê Rûsya Donetsk û Luganskî ser o dewam kerd.

Mabênê dewletanê îşxalkeran de “quîd pro quo” qewimîya. Îşxalê Rûsya ra tepîya na rey welatanê rojawanî vera Rûsya tayê hêzê caardişî kerdî. Yanî metodê şerê hîbrîtî şuxilnayî. Çend şî, îdareyê Ukrayna hîna zaf nêzdîyê rojawanî bî. Verî olîgark Pyotr Paraşenko bi hetkarîya rojawanî ame îqtîdar. Dima komedyen Volodîmîr Zelenskîyî herinda ey girewt. Wirdî serekkomaranê Ukrayna xizmetê olîgarkanê Ukrayna kerd. Ê olîgarkî bi welatanê rojawanî wayîrê tayê têkilîyan bîyî. Rojawan bitaybetî vera tevgerê Stepan Bandera bêveng mend. Her ca de peyker û bustê ci ameyî viraştene. Nameyê Lenînî ûsn. kuçeyan û caddeyan ra ameyî wedaritene. Welatanê rojawanî paştî daye îdarekaranê Ukrayna. Çike ê hema vera mêrasê Yewîya Sovyetan şer kenê. Yanî merdeyanê sosyalîstan ra zî tersenê. Paştîdayîşê tevgerê Bandera oncîna metodêkê şerê hîbrîtî bî.

Rûsya serra 2014î ra heta 2022 amadekarîya îşxalê hîrayî kerdbî. 24ê sibata 2022î de kewte bajaranê Ukrayna yê sey Çernîgov, Harkov, Marîupol, Herson, Zaporîjya, Melîtopolî. Putînî roja ke hêrişî dest pê kerd vat ke ê do Ukrayna neonazîyan ra pak bikerê. Seba îşxalê xo “sebebo lazim” viraşt. Dima tayê cayê Harkovî, Marîupol, Herson, tayê warê Zaporîjya, Melîtopol, Berdyansk ameyî destsernayene. Gelo nê bajarî destê Rûsya de bimanê, tîya de zaf vurîyayîşo radîkal beno? Qet hêvîya mi çin a. Pergalo olîgarşîk o ke Rûsya de hukm keno nê bajaran zî gêno binê bandora xo. Şarê rûsî bizano ke paştîdayîşê Putînî yeno manaya paştîdayîşê olîgarkan. Kolonyalkerdiş do vera şarî zafêr bibo. Putînperestîye do şarê rûsî rê xizanîye û xem bîyara. Putînî bi nê şerî seba şarê rûsî dafike amade kerde. Şer çiqas ke dewam bikero, “patrîotîzm” do hende gandar bibo. Patrîotîzm vera tîranan çimê şarî kor keno.

Welatê rojawanî vera hêrişanê Rûsya reyna beşdarê metodanê şerê hîbrîtî bîyî. Hem warê ekonomîkî hem zî warê enerjî de tayê gamê girdî ameyî eştene. Nêzdîyê 800 şîrketî bazarê Rûsya ra vejîyayî. Mîyanê nê şîrketan de xeylê şîrketê şinasnayeyî estê: Starbucks, McDonald’s, Apple, Samsung, Mercedes, IKEA, Renault, Volvo ûsn. Gelo herinda nê şîrketan de se bî? Şima vanê qey beşê nî şîrketan seba şarî şuxilîyenê. Qetî nê. Pergalê olîgarşîkî de her tim “kar” dîyarker o. Ma eşkenê tayê nimûneyan bidê. Mîsal şerî ra verî Rûsya de 850 beşê McDonald’sî estbî. Olîgarko ke nêzdîyê Kremlînî yo Aleksandr Govorî nê beşî pêro herînayî. Logoyê marka avurna û nika sermayeyê xo zêdîneno. Yew nimûneyo bîn Starbucks o. Rûsya da 130 beşê nê şîrketî estbî. Hunermendê rockmuzîkî Tîmatî û hemparê ci Anton Pînskîyî beşê nê şîrketî herînayî. Starbucks nika binê nameyê “Stars Coffee” aktîvîteya xo ano ca. Tîmatî zî nêzdîyê Putînî yo. Verî ey seba Putînî deyîrêke viraştbî. Nameyê deyîre “Putîn embazê min o tewr baş o” bî.

Rojawanî warê ekonomîkî de zî vera Rûsya tayê gamê tesîrdarî estî. Bitaybetî gaz seba ekonomîya Rûsya muhîm o. Coka xeta lule ya vakurî ya gazî ameye betalkerdene. Eke na xete akerde bibîyayêne, serdestîya Rûsya welatanê Ewropa ser o zêdîyayêne. Dewleta Amerîka xurtbîyayîşê Rûsya asteng kerd. Bado hêzanê caardişî warê enerjî de bêmabên dewam kerd. Welatanê Ewropa herînayîşê neftî zî sînordar kerd. Ê wazenê ke butçeya Rûsya biriznê. Labelê heta nika ekonomîya Rûsya zêde zîyan nêdî. Tena “resesyon” esto. Bankaya Merkeze ya Rûsya heta nika bi serkewtişî ekonomî “stabîlîze” kerd. Aye destûr nêda ke enflasyon berz bo. La eke şer derg beno, ekonomîya Rûsya do xirab biba.

Ukrayna de şerê kolonyalkerdoxan bişîdetî dewam keno. Nê rojan artêşa Ukrayna ti vanê hêrişê Rûsya kena û aye tayê bajaran ra peyser erzena. Demê ameyoxî de her îhtîmal esto. Netîce de ez wazena vatişêkê Lenînî tîya de îqtîbas bikerî. Vano ke “Pawitişê welatî birastî vera cergêka kapîtalîste pawitişê cergêka bîne yo.”