Masaya Elewîyan a HDPyî ra Sevgî Kîşîn Sazane bale ante krîzê ekonomîkî, demê vîjnayîşî û dîyar kerd: “Kesê ke tayê hesabê ci estê elewîyan ser ra yew kayî kay kenê.”
30 temmuze de Anqara de bi hawayêkê hemwextî hêrişê Cemxaneyê Ana Fatma, Şah-i Merdan, Komela Dewa Gokçebali û Weqfa Elewîyanê Bektaşîyan a Terekeme ame kerdene.
Endama Masaya Elewîyan a Komîsyonê Şaran û Bawerîyan a HDPyî Sevgî Kîşîn Sazane derheqê hêrişê dezgehanê elewîyan ê Anaqara de ANFyî rê qisey kerd.
Sazane seba ke hêrişî bi hewayêkê hemwextî roja verên a Muharremî de ameyî kerdene no sey mesajêkî hesibna û vat: “Ma zanayêne ke ê vanê hêrişkar gej o. Gama ke xebera hêrişî ameye ez sey îdarekarêka Cemxaneyê Ana Fatma şîya warê qewimîyayîşî. Çîyo ke verî bale ma ante kerrayanê ke berî şikitbî, mermer bî û kerrayê ê dormeyî nêbî. Hêrişkarî amadekerde ameybî. A roje planêkê ma zî bîbî. Roja verên a Muharremî de ma waştêne cem bikerê. Seba ke pîrê ma nêweş kewt ma cem betal kerdbî. Yanî îhtîmalo pîlo ke no yew provokasyon bî. Kerreyê ke erzîyayî wirdî nîyê. Eke biginayî kesî rê eşkayêne birîndar bîkerê.”
Sevgî Kişin Sazane vat: “Kesê ke vanê ameyê tepiştene nameyanê sey Bawer, Canî şuxulnenê. Kenê ke bi nê nameyê hêrişî bierzê milê rêxistinanê çepgiran ser. Rêxistinêka çepgire qey hêrişê cemxaneyêkî kena ke. Tirkîya mîyanê krîzê girdî de ya. Krîzo ekonomîk, krîzo sîyasî, demê vîjnayîşî, dengeyê ke Rojhelatê Mîyanênî de newe benê. Kesê ke tayê hesabê ci estê elewîyan ser ra yew kayî kay kenê.”
