Serekê Cemxaneyê Amedî Aydin Atliyî hêrişê vera elewîyan şermezar kerdî û wina qisey kerd: “Ma elewîyî û dormeyê demokratîkî nê hêrişan ra tepîya zêdêr yew bîyî.”
Çend rojî verî Anqara de roja yewine ya rojeyê Muharremî de vera cemxaneyanê Ana Fatma, Şah-i Merdan, Komela Dewa Gokçebelî û Weqfa Elewîyanê Bektaşîyan ê Tirkmenan hêrişê organîzekerdeyî qewimîyayî. Peynîya hêrişê bikardî vera Weqfa Elewîyanê Bektaşîyan ê Tirkmenan cinîyêke dirbetin bîye û ameye neweşxane berdene. Dezgehanê elewîyan û rexistinanê demokratîkan hêrişî şermezar kerdî û seba paştîdayîşî venga komelî daye.
‘Hêzêkê îlahî emir dayo hêrişkarî’
Çend rojî dima kerdoxê hêrişan Ahmet Ozan K. ame tepiştene. Dîya zanayene ke hêrişkar Îzmîr de înşaatan de xebitîyayêne. Pê wesayîtê xo yê taybetî ameyo Anqara û mîyanê 45 deqayan de hêrişê dezgehan kerdo. Goreyê cipersayîşê polîsî hêrişkarî pare kerdo ke hêzêkê îlahî ey rê emir dayo û ey bi xo no hêriş kerdo. Labelê na eşkerayîye mîyanê elewîyan de xeylê yena nîqaşkerdene. Senî ke qirkerdişanê verênan de sûcdarî ameyî nimitene, eşkerayîya kerdoxî nika oncîna armancê winayênî teşmîl kena.
Zaf bajaran de dezgehê elewîyî vera hêrişî bêveng nêmendî û înan nêrazîbîyayîşê xo mojna. Înan ra yew Cemxaneyî Amedî yo. Her roje zaf cayan ra heyetî û rexistinî tîya zîyaret kenê û paştî danê. Ma zî sey rojnameyî Xwebûnî Cemxaneyî Amedî zîyaret kerd û serekê cemxaneyî Aydin Atli ra fikr girewt.
‘Tayê kesan hêriş organîze kerd’
Atliyî bale ante hêrişan û wina qisey kerd: “Nê hêrişî teyna nika nênê kerdene. Demê vîyarteyî ra nata her tim dezgehê elewîyî binê hêrişan de yê. Bitaybetî Tirkîya de key ke persê ekonomîkî û sîyasî qewimîyenê raver elewîyî û kurdî maruzê hêrişan manenê. Birastî serekê cergî Sedat Pekerî verî vatbî ke vera elewîyan hêrişî yenê organîzekerdene. Ma çiyo winasî pawitêne. Şeklê hêrişî xeylê balkêş o. Kesêk yeno, yew saete de hêrişê dezgehan keno û remeno. Dîyar o ke tayê kesan no hêriş organîze kerdo. Sebebê hêrişan çi yo? Eke kerdoxê hêrişanê ke verê cû de qewimîyayî biameyêne eşkerakerdene nê hêrişî nêbîyêne. Eke kerdoxê qetlîyamê Meraşî eşkera bibîyêne, o wext Çorum de beno ke qetlîyam nêbîyêne. Eke qetlîyamê Çorumî roşnî bibîyêne, qetlîyamê Sêwasî nêbîyêne. Nê qetlîyamî ke biameyêne roşnîkerdene, o wext qetlîamê Roboskî, Anqara, Pîrsusî nêqewimîyêne. Yanî eke ma bi kerdoxan nênê têrî, peynîya nê hêrişan nêna. Labelê ma do vera nê provokasyonan mêrê. Bi destê dormeyanê demokratîkîyan zaf reaksîyono gird ame mojnayene. Embazê ma hema zî ma zîyaret kenê û paştî danê. Ma qetî hewcedarê paştîdayîşî yê û ganî ma her tim pîya têbigêrê. Bi nê hawayî ma do nê hêrişan wedarê. “
‘Ma zêdêr yew bîyî’
Aydin Atliyî pare kerd ke ê hema sebebê nê hêrişan nêzanê û vat: “Derheqê hêrişan de ma de yan merkezê pêroyî de zaniştişo akerde çin o. Wezaretê karanê zerreyî û qewetê asayîşî tayê eşkerayîyî kerdî la ê seba ma tatmînkar nîyî. Nê hêrişî gelo seba weçînayîşî ameyî kerdene? Demê ameyoxî de her çî do dîyar bibo. Beno ke nê hêrişî vengê lingê weçînayîşî yê. Keso ke wina fikrîya, serkewt? Nê, mi gore ê sernêkewtî. Ma elewîyî û dormeyê demokratîkî nê hêrişan ra tepîya zêdêr yew bîyî. Ez hêvî kena ke naye ra tepîya serebûtê winayênî nêbenê. Rixmê her çî, ganî ma amadekarîya xo bikerê.”
