Komela Ekolojî ya Mêrdînî ra Derya Akyole birîyayîşê daran ser o qisey kerd û vat ke talanê xoza armancê rantî reyde sey polîtîkayêka şerê taybetî yeno kerdene.

Kurdistan de xoza qestî ra hetê dewlete ra yena qirkerdene. Bi taybetî nê rojan de serkêşîya leşker û natoran (qoricîyan) de darî birîyenê. Herêmanê Besta, Cûdî û Gabarî yê Şirnexî de 2 serrî yo bi bahaneya ‘asayîşî’ binê çimdarîya leşkeran de darî birîyenê. Reyan dewa Samosî ya qezaya Xozatî ya Dêrsimî de binê kontrolê leşkeran de bi mengan o darî birîyenê û destûr nêdîyeno ke dewijî şorê herême.

Komela Ekolojî ya Mêrdînî ra Derya Akyole derheqê babete de ANFyî rê qisey kerd.

Akyole îfade kerd ke Kurdistan de talanê xoza armancê rantî reyde sey polîtîkayêka şerê taybetî yeno kerdene. Akyole pare kerd ke armancê tewr pîl ê polîtîkayanê şerê taybetî zî koçkerdiş û asîmîlekerdiş o.

Akyole wina qisey kerd: “Şarê Kurdistanî raştê pêro hêrişan ame, têkoşînê vera wêrankerdişê ekolojîkî de tedayêka girane dîye. Mîyanê komelê Kurdistanî de hişmendîya komelê ekolojîkî astêka avere de ya. Vera birnayîşê daran bi taybetî Şirnex de têkoşîn dewam keno. Goreyê qanûnan birnayîşê daran sûc o. La bi polîtîkayanê şerî bi bahaneya ‘asayîşî’ birîyayîşê daran yeno meşrûkerdene. Polîtîkaya bêcezaverdayîşî zî sey sîstemêkî dewam kena. Rixmê ney zî dezgehê ke îdîaya pawitişê xoza kenê, vera rewşa Şirnexî bêveng ê. Sey qirkerdişê kurdan qirkerdişê xozaya înan zî sey meşrûyî yeno dîyene.

Tîya de têkoşînêko komelkî lazim o. Çunke zeraro ekolojîk tena herêmêke de nêmano. Na babete pêro dinya eleqedar kena.”