Dewleta tirke tewr peynî 20ê temmuze de dewa Perexî ya Zaxoyî ya Başûrê Kurdistanî de turîstê erebî kerdî hedefê xo û bi bombardumanî qetil kerdî. Hêriş de zafê ci cinî û domanî 9 kesan dinyaya xo bedilnaye û bi desan kesî birîndar bîyî. Qirkerdişî ra dima hemkarê Tirkîya Iraqî de nêrazîbîyayîşê pîlî qewimîyayî û Iraq de seba rojêke şîn ame îlankerdene ke Tirkîya qet seba hemwelatîyanê xo bi hîsgerî tênêgêrena û ekse ci bi destê xo qetil kena. Serekwezîrê Iraqî Mistefa Kazimîyî hêrişê dewleta tirke şermezar kerd û venga sersefîrê Tirkîya da ke erdê Iraqî ra hêzanê xo bianca.
20ê temmuza 2015î de endamê Federasyonê Komeleyanê Ciwanan ê Sosyalîstan (SGDF) 300 ciwanî Stenbolî ra û cayanê bînan ra kewtî rayîr û Merkezê Kulturî yê Amara de ca bîyî. Pêvînayîşan dest pêkerdbî. Dima ke Qeymeqamî reyde pêvînayîş ame kerdene ciwanan waşt ke verê berê Merkezê Kulturî yê Amara de eşkerayîye bidê. Nê wextî de kiştox û çeteyê DAIŞî Abdurrahman Alagoz bombayê ke serê ci de bîyî, teqna. 33 ciwanî bi hawayêkê barbarî ameyî qetilkerdene.
Hêrişker Abdurrahman Alagoz û birayê ci Yunus Emre Alagoz seba ke ‘terorî ra gêrîyayeno înan’ qeydê înan estbî û hêrişî ra ver babîyê înan gerreyê lajanê xo kerdbî. Qirkerdişê Pirsûsî ra dima Yunus Emre Alagoz Garê Anqara de zî qirkerdişêk kerd. Tîya de 103 kesî ameyî qetilkerdene û 419 kesî zî birîndar bîyî.
Qirkerdişê Garê Anqarayî ra dima 5ê Hezîrane de Amed de zî qirkerdiş qewimîya. Partîya Şaran a Demokratîke (HDP) di rojî verê weçînitişê 7ê Hezîran a 2015î Meydanê Îstasyonî de mîtîngê ‘Merdimîya Girde’ organîze kerd. Mîtîng de hêrişo bombayin ame kerdene û 5 kesan cuya xo vîndî kerde û bi seyan kesî zî birîndar bîyî.
Nê hêrişê ke tîya de nusîyayî û xeylê hêrişê bînî bi destê dewleta tirke virazîyayî. Tarîxê dewlete bi qetlîyam û qirkerdişan dekerde yo. Asmênê welatî ra gonî û goştê merdiman vareno. Vera şar, kultur, xoza û pêro ercan de her tewir qetlîyam û bêhurmetî virazîyenê. Tirkîya seba hemwelatîyanê xo rojêke daxî şîn îlan nêkerda. Çimkî lazimo ekonomî qet nêvindera û seba hêrişanê erd û hewayî pere deba kasaya dewlete. Dewlete seba menfîetê xo her tewir qilêrîyan kena. Derdê ci şar, kultur, xoza swb. nîyo. Kam ca de menfîetê ci bibo destê xo erzeno ewja û lazim bikero qetlîyam daxî keno. Binê heme qirkerdiş û qetlîyam de helbet çîyêk esto.
Qetlîyamê Pîrsûs, Anqara, Dîlok, Amed û Zaxoyî nînê vîrîkerdene.
