Hemserekê Pêroyî yê HDPyî Mîthat Sancarî roniştişê Dewaya Kobanê ra ver wina qisey kerd: “Peynîya nê îqtîdarî ameya. Kesê ke tewrê na bêedaletîye bîyê do hesab bidê.”

Roniştişê 14. yê Dewaya Kobanê ya ke tede 21ê ci tepişteyî 108 kesî yenê muhakemekerdene, Kampusê Zîndanê Sîncanî de dest pêkerd. Hemserekê Pêroyî yê HDPyî Mîthat Sancarî roniştişî ra verî verê kampusî de eşkerayîyêke daye. Polîsan nêverda ke hemwelatîyî zî tewrê eşkerayîye bibê.

Sancarî pare kerd ke birê seba lezkerdişê dewa zêdîyayî, heqê pawitişî nêhesîbîyeno û vat: “Na dewa seba dîzaynkerdişê sîyasetê Tirkîya parçeyêkê projeyê muhendîsî yo. Na mehkeme huqûqî ra ney îqtîdarî ra talîmatan gêna. Ma xoverdayîşî hol zanenê. Embazê ma hê salone de raştîyan anê ziwan. Ma do her ca de raştîyan vajê. Wextê peyênî de dewayanê bînan de zî bêhuqûqîyê winasênî qewimîyayî. Heta ke ma vera pêro bêedaletîyan nêvejîyê welat nêxelisîyeno. Ma venga pêro partîyanê muxalefetî û waştoxanê edaletî danê ke na dewa teqîb bikerê û pîya vera nê huqûqê dişmenîye vejîyê.

Peynîya nê îqtîdarî ameya. Kesê ke tewrê na bêedaletîye bîyê do hesab bidê. Weçînayîşê verê ma de no îqtîdar do şêro. Coka ma do bêmabên têkoşînê edaletî rê dewam bikerê.”