Badê ke êrişanê Rûsya yê verva Ukrayna dest pê kerd, welatê Swêd û Fînlandîya seba ke bibê endamê NATOyî, sere piro da. Nê serepirodayîşî seba dişmentîya verva kurdan firsendêk da Erdoganî.
Erdoganî endamtîya Swêdî rê astengî vete û çend şertî dayî vernîya hukumatê Swêdî ke nê şertî dişmentîya verva kurdan bîyî. Ro ser na mijare, mabênê Swêd û Tirkîya de kombîyayîşî pêk ameyî.
Serokwezîra Swêdîya ke Partîya Sosyaldemokratan ra ya, Magdalena Anderssone di vernî de vat ke ê do çend şertanê Tirkîya teqez qebûl mekerê. Magdalena Andersson wexto ke bîye serokwezîr peymanêke îmze kerdbî ke do hukumatê Swêdî zafêrî paştîdayîş bido Rayverîya Xosere ya Rojavayê Kurdistanî. La Magdalena Anderssone sozo ke dabî nêtepişt.
NATO hefteya verêne de paytextê Îspanya Madrîd de kom bî. Di na zîrwe de serokê dewlet û hukumatanê ke endamê NATOyî yê tewir bîyî û meseleya endamtîya Swêd û Fînlandîya ameye nîqaşkerdene. Badê kombîyayîşê derheqê dişmentîya verva kurdan de ame zanayene ke, Tirkîya peymane vernîya endamtîya NATOyî akena îmze kerde. Yanê Tirkîya endamtîya Swêd û Fînlandîya qebûl kerde. Di na peymane de şertê ke Tirkîya vernîya Swêd û Fînlandîya dabî estbî. Şertê Tirkîya yê hemkarîya bi dewleta tirke reyde yê verva PKK û rayvistinanê girêdayeyê ci, apeygirewtişê qerarê paştîdayîşê PYD û YPGyî, apeygirewtişê qerarê embargoya çekan ya verva Tirkîya, hetkarîya îstîxbaratî, teslîmkerdişê ê kesanê ke Tirkîya wazena û vindarnayîşê propagandaya verva Tirkîya di na peymane de ca girewtbî. Swêd û Fînlandîya zî na peymane îmze kerde.
Swêdî 28ê hezîrane de heme şertê Erdoganî yê verva şarê kurdî qebûl kerdî. Bi vatişêkê bînî: Swêdo ke tu şerêkî de ca nêgirewt, welatêko demokratîk bî û seba şaranê bindestan bi keyeyêke bi hêvî, nika vernîya faşîzmî de sere çewt kerd. Naye yena wateya zêdnayîşê zilmîyo verva kurdan û sazîyanê êyê legalî.
Di serra 1986î de wexto ke serokwezîrê Swêdî Olof Palme amebî kiştiş, şaro kurd û PKK amebî sûcdarkerdene. Ez bixo şahîdê ê demî nêya. La ez ke Swêd de daya xo ra bîya û naca de pîle bîya, bi hîkayeyê zilmê verva kurdan ê bi nê sebeban pîl bîya. Zext, zilm û teqîbkerdiş…
Şaro kurd ê wextî de Swêd de bî qurbanê polîtîkayanê qilêrinan ê hegemonîkan û nê 36 serrî ra dima reyna bî qurban. Di parlamento, mekteb, sazî û kuçeyan de Swêdî ma rê demokrasî, heq û huqûq bonder kerd. Şaro kurdo ke faşîzmê dewleta tirke ra ame tîya, Swêd zê keyeyê xo vîna. Heman Swêdî ewro heme ercanê demokrasîye, heqanê merdimayîye binling kerdî. Heta îradeya parlamento û parlamenteranê xo zî binling kerde. Reyna dewleta Swêdî, YPG û YPJyo ke verva çeteyanê DAIŞyî şer kerd, bi deshezaran ciwanê kurdîyê ke xo feda kerd û dinya xelisna, ewro rot. Nika do Swêd paştîye bido heme sûcanê şerî yê dewleta Tirke. Swêd despotêkî reyde gonîya şarê kurdî ser o, pêame. Êdî nê welatî de tu kurdêk nêeşkeno aramî de bicuwîyo. Çi heyf!
Vatişêkê kurdan ê tarîxî esto: Xêncê koyan, embazê kurdan çinê yê. Çi vatişêko raşt o!
La gere Erdogan baş bizano: Verê na peymane nêeşka şarê kurdî û PKKyî bivindarno û do badê na peymane zî do nêeşko bivindarno.
Hetê bînî ra zî, resmêkê Erdoganî bi serokwezîra Swêdî Magdalena Andersson û wezîra karanê teberî ya Swêdî Ann Lînde di çapemenîya dinya de vejîya. Zê cinîyêke, wexto ke mi no resim dî, ez zaf şermayeya. Nê cinîyanê ke xo rê vanê femînîst û demokrat, verva Erdoganîyo ke her roje bi sebebê polîtîkaya ci cinîyê yenê kiştiş û azadîya merdiman yena astengkerdiş, senîn beno ke sere çewt kerd?
