Pergalê dewleta faşîşte ya tirke badê îqtîdarê Çîler-Gureş û Agarî, di persgira kurde de yo tewir çimsûr Erdogan dî. Badê serra 2O14î de, xususî bi vejîyayîşê DAIŞî reyde, na persgire ameye dewrê Erdoganî kerdene. Erdoganî badê pêkerdişê bi pergalê zerre û teberî reyde, planê topyekûnî yê şerê qirkerdiş û îmhayî da destpêkerdene. Bi vatişêkê bînî Erdogano ke xeyalê siltanîtîye kerdê qederê xo bi nê planî reyde gire da. Bi nê sebebî zî di planê xo de heme sînorê exlaqî reyde sînorê dişmentîye zî derbaz kerdî.
Şefê faşîstî derbeya yewine bi xoverdêrîya tarîxî ya Kobanê werde. Têkşîyayîşê DAIŞî Kobanê de bî destpêkê têkşîyayîşê Erdoganî zî. Erdogano ke vatêne “Ma do camîya emewîye de nimaj bikerê”, Tirkîya viste mîyanê krîzêkê aborî, sîyasî û civatî. Krîz ewro di asta tewir berze de yo û seba ke çend qurişî pereyan bi dest bifîno, kesanê ke na ra ver zê terorîst û qatil bi name kerdêne, verar keno. O terorîst prensê Erebistanê Seûdî Salman bî.
Erdogan bado ke Kobanê de derbêka pîle werde zafêrî kurdan ra nefret kerd û bî dişmeno tewir har. Êriş û îşxalê Efrînî dima ra Girê Spî û Serêkanîye yo bi hemkarî û destûrê Rûsya û Amerîka, qasê ke di nîzamê muesesî yê Tirkîya de cayê xo viraşt. Badê Qibrisî yewin dore qaşo herra Tirkîya verhîra kerde.
Di nê mabênî de zî heme îmkanê dewlete, seba xo û keyeyê xo seferber kerdî. Bi dizdî û bêrayîyanê xo kewt rewşêka winayine ke, ewro di qadê mîyannetewî de bi eşkerakerdişê sermîyanê xo yê şexsî û keyeyî, yeno tehdîtkerdene. Na rewşa retame, her roje hetê serekê CHPyî ra yena rojdeme. Heke Erdogan, Erdogano verên bibiyêne û di qirkerdişê kurdan de bi ser bikewtêne, serekê CHPyî bi tu hawayî nêşikayêne nînan eşkera bikero. Çimkî Erdogan di gureyo ke dîyabi ey de bi ser nêkewt. Di planê qirkerdişê kurdan û bi peynîkerdişê persgira kurde de têk şî.
Têkşîyayîşo verên di êrişê îşxalî yê 23ê nîsana 2021î yê verva Herêmanê Pawitişî yê Medya de, rixmê heme hetkarî û hêzanê NATOyî têk şî. Di 14ê nîsane de bi teyareyanê şerî û 17ê nîsana 2022î de zî bi êrişêko verhîra dorêka bîne êrişê Zap, Metîna û Avaşînî kerd. Erdoganî êrişê îşxalî yê parî ra tay dersî vetîbî û di êrişê 2022î de PDK bi temamî kerd perçeyêkê şerî. Helîkopter û hewelnayişê hêzanê bejayî êdî Tirkîya ra nê herêmanê bi kontrolê PDKyî ra ameyêne kerdene.
Nê êrişî serî ra 2 mengan zafêrî wext derbaz bî. Rixmê heme hetkarî û teknîko tewir averkewte yê NATO û hemkarîya PDKyî, artêşa Erdoganî tarûmar bîya. HPGyî 14ê hezîrane de bîlançoya 2 mengan eşkera kerde. Bi goreyê bîlançoya HPGyî ke aye de tu şik û guman çîn o, heta hûmare zafêrîya kemîyêrî nîya, 985 esker û çeteyê dewleta tirke ameyê kiştene. Di roja ke na bîlanço ameye eşkerakerdiş zî 58 eskerî ameyî kiştene. A roje ra na heta zî tewir tay 150 eskerî ameyî kiştene. Yanê bi vatişêkê bînî nizdê 2 mengî û nîmî de koyê Kurdistanî nizdê hezar û 200 eskeranê artêşa tirke rê bîyî goristan.
No, badê Şerê I. yê Cîhanî zayîatê tewir pîl ê eskerî yê dewleta tirke yo. Helîkopter û wesayîtê zirxinîyê ke ameyî îmhakerdiş û derbkerdiş zî cayê xo de yê. Erdogan û Soysuzo ke seba qedênayîşê PKKyî amebî wezîfedarkerdene, kelebestanê Zapî de aleqîyayî. No şer bî peynîya Erdoganî û îqtîdarê ey ke bekaya xo bi nê şerî ya girê dabî.
Rayîrberanê KCKyî ra Duran Kalkanî di qiseykerdişêkê xo de vatbî; “Roja îqtîdarî ra kewtişî, roja mergê Erdoganî ya”. No vatiş, vatişêkê rêzî ra nîyo û hetê kesêkê rêzî ra yî ra zî nêameyo vatene. Paradîgmaya Rayver Apoyî tehlîlkerdişê tarîxê merdimayîye ser o ameya ronayene. Rayîrberê KCKyî 40 serrî yo di cayêkê zê Rojhelatê Mîyanênî de polîtîka kenê û reyna 40 serrî yo verva NATOyî şer kenê. Di rewşa ke di Tirkîya de însanî veyşanîye ra întîxar kenê de Erdogan nê tersî ra nêşikeno qerarê weçînayîşî bigêro.
Erdogano ke seba qirkerdişê kurdan amebî wezîfedarkerdene, ewro seba xo xelisnayîşî reyna kurdan ser o polîtîka keno. Heke pêk bêro, weçînayîş tewir erey orteyê hezîrana 2023î de yo û serrêke zî temam nêmend a.
Vatişo ke birêz Duran Kalkanî vatbî keweno merîyete. Roja ke Erdogan weçînayîşî vînî bikero, roja mergê ey a. Erdogan bi nê tersî dorêka bîne Rayver Apoyî ser o polîtîka keno. Qelemşorê Erdoganî behsê rojdema newîye ya çareserkerdişê persgira kurde kenê. Qaşo ke bi Serek Apoyî reyde do pêdîyayîşî pêk bêrê. Çi raşt, çi raybazêka şerê psîkolojîkî, qemça masaya ke feletîya êdî nîna girotiş. Erdogan seba mergî ra xelisîyayişî dorêka bîne hewceyê Rayver Apoyî beno û bîyo. Rayîrêka bîne nêmenda. PKKyî bi doran vato; “Ê ke ro cehdê qedênayîşê PKKyî kenê, bixo çinê benê”, na raştîya tarîxî dorêka bîne xo di garg kena…