Nexweşiya kolera (zikêşê) ku ji ber ava qirêj bi mirovan re çêdibe di van rojên dawî de li bajarê Silêmaniyê zêde bûye. Li parêzgeha Silêmanî ya Herêma Federal a Kurdistanê nexweşiya kolera belav dibe, herî zêde di nava zarokan de tê dîtin. Îro li nexweşxaneyeke taybet a zarokan li Silêmaniyê mirina zarokekî 4 salî ji ber nexweşiya kolerayê hate ragihandin.
Li gorî daxuyaniya berdevkê gerînendeya tenduristiya Silêmaniyê Saman Letîf di nava heftiyekê de 4 hezar mirovan ji ber zikêşiyê serî li nexweşxaneyan dane. Ew jî tê wateya ku rojane derdora 700-800 kesan serî li nexweşxaneyan dane. Saman Letîf da xuyakirin ku ew guman dikin piraniya van kesan bi nexweşiya kolerayê bin û rewşa wan ji bo tehlîlan şandine Bexdayê.
