Keyeyê Haydar Şeşoyî Şingal de şerê taybetê PDKyî serûber keno.
Dewleta tirke 15ê hezîrane de pê droneyanê çekdaran hêrişê Meclîsê Şarî yê Sinûnî yê Şingalî kerdbî. Hêriş de domanêko 12 serre kişîyabî û tay kesî bîbî. Hêrişî ra dima Meclîsê Şarê Kurdî bi eşkerayîyêke û rayîrê çapemenîye da zanayene ke tay kesê xayînî agahîyê danê dewleta tirke ke nê kesî pabesteyê PDKyî yê.
Wexto ke Meclîsê Şarî yê Sinûnî vêşayêne Haydar Şeşoyo ke xo sey fermandarê hêzanê Êzidxanî dano şinasnayene, derheqê hêrişî de tay eşkerayîyî dayî. Eşkerayîya ci ameyêne manaya îtîrafê hêrişê Sinûnî. Ey bi hawayêkî pare kerd ke têkilîya ci ya bi nê hêrişî esta. Keyeyê Şeşoyî Şingal de sey mînyaturê xanedanîya Barzanîyan o. Mîyanê kurdan de keyeyê Barzanîyan çi îfade keno, mîyanê komelê êzidîyan de zî keyeyê Şeşoyî heman çi yo.
Keyeyê Barzanîyan senî xizmetê dewleta tirke keno û kurdan rê îxanet keno, keyeyê Şeşoyî zî mîyanê êzidîyan de wina têgêreno. Têkilîya keyeyê Şeşoyî û keyeyê Barzanîyan 1970an ra yena. 2014î de wexto ke PDK û dewleta tirke waştêne bi destê cerganê DAIŞî êzidîyan bidê qirkerdene, bi mudaxeleyê HPGyî verê qirkerdişî ame girewtene û komelê êzidîyan azad bî. A roje ra nata keyeyê Şeşoyî PDK û dewleta tirke reyde bi aktîfî tewrê şerê qirkerdişê komelê êzidîyan beno.
Haydar Şeşo Şingal de torra ajanan awan keno. Şingal de koordînatorê şerê taybetî yê PDKyî û dewleta tirke Haydar Şeşo yo. Wexto ke teyarayê şerî û keşfî yê dewleta tirke Şingal ser o gêrenê, Şeşo eşkerayîye dano çapemenîye. Xeylêk hêrişanê vera serkêşanê Şingalî û heta hêrişê vera Meclîsê Sinûnî ra o mesuldar o.
