Hemsereka Pêroyî ya HDPyî Pervîn Buldane vat ke Tirkîya de cinîyî raştê şîdetî yenê û wina dewam kerd: “Ma do her ca de Peymana Stenbolî bipawê.”

Dewaya ke Meclîsê Cinîyan ê HDPyî û rêxistinanê cinîyan vera betalkerdişê Peymana Stenbolî akerda, Mehkemeya Şêwirmendîye de yena kerdene. Nameyê Meclîsê Cinîyan ser o Hemsereka HDPyî Pervîne Buldan do pawitiş bikera.

Roniştişê dewa hetê Buldane, Vervatoxa Meclîsê Cinîyan Ayşe Acar Başarane, Hetkara Sereka Kome Meral Daniş Beştaşe, parlamenterê cinîyî û endamê Meclîsê Cinîyan ra ameyî teqîbkerdene.

Buldane roniştişî ra verî verê mehkeme de eşkerayîye daye û pare kerd ke Peymana Stenbolî peymana winasêne nîya ke pê vateyêkê camêrdî şewêke de bêra wedaritene. Buldane vat: “Ewro Tirkîya de cinîyî raştê şîdetî yenê, yenê qirkerdene. Ma bira betalkerdişê Peymana Stenbolî qebul nêkenê. Ma her ca de do Peymana Stenbolî bipawê. Ma do qetî na bêhuqûqîye qebul nêkerê û pîya nê prosesî teqîb bikerê. Ma do têkoşînê xo rê bê tawîzan dewam bikerê.”