Dewa Xelîfanî ya qezaya Kanîreşî ya Çewlîgî de planê santralê termîkî kenê. Çewlîgijan vizêr medyaya sanale de bi tagê #BingöldeTermikSantralİstemiyoruz vera nê nêrazîbîyayîşê xo mojna.
Dewa Xelîfanî ya qezaya Kanîreşî ya Çewlîgî de yeno plankerdene ke santralê termîkî bêro viraştene. 7ê hezîrane de (ewro) Dezgehê Gurenayîşê Komirî yê Tirkîya do semedê nê santralî îhale bikero.
Çewlîgijî bi rojano vera nê santralê ke do cuya înan ser zaf tesîro xirab bikero nêrazîbîyayîş mojnenê.
Parlamenterê HDPyî yê Çewlîgî Erdal Aydemirî zî çend rojî cuwa ver babete kiriştibî meclîsî û veng dabî ke wa verê nê tehlukeyî bêro girewtene.
Çewlîgijan seba ke ewro îhale esto, vizêr medyaya sanale de bi tagê “ma Çewlîg de santralê termîkî nêwazenê” vera santralî nêrazîbîyayîşê xo mojna.
Baroyê Çewlîgî vat ê do seba ke verê nê qirkerdişî bîgêrê çîyo ke do destê înan ra bêro bikerê.
KAYY-DERî zî bale ante ziraro ke santral do bibo awe, weşîye, citkarî û xozaya herême ser û vat ganî îhale de cade bêro vindarnayene.
Reyna xeylêk parekerdişanê bînan de semedê pawitişê weşîya şarî û xoza ame vengdayene ke wa verê nê projeyî cade bêro girewtene.
