Stenbol de çalakîya ke vera hêrişanê dewleta tirke ameye şermezarkerdene de ame vatene: “Ma aştîye wazenê”.

Stenbol de hetê KCD, HDP, DBP û TJA ra hêrişê îşxalî yê dewleta tirke yê ke bi hemkarîya PDKyî vera vaşûrê Kurdistanî yenê kerdene ameyî şermezarkerdene.

Rayraşîyayîş de dovîzê sey “Tecrîd sûcê merdimîye yo”, “Ma aştîye wazenê” û “Bimorê xîyanet” ameyî kiriştene. Şarî bi slogana “şerî rê nê, aştîye cade nika” Meydanê Îstîklalî de dest pê rayraşîyayîşî kerd. Polîsan verê Konsolosxaneyê Rûsya de şar girewt binê ablûka. Rixmê ablûqa sloganan dewam kerd. Parlamenterê HDPyî Sezaî Temellîyî binê ablûqa de eşkerayîye daye. Temellîyî vat ke şer feqîrîye ya û beno sebebê mergê qican û veng da ke wa her kes hetê aştîye de ca bîgêro.

Endamê Meclîsê Ciwanîye yê HDPyî yê ke verê înan hetê polîsan ra gerîyayî, bi slogananê “Bê Serok jiyan nabe”, “Bijî berxwedana Zapê”, “Bijî berxwedana Avaşîn”, “HDP hêvî ya, hêvî payra ya” û “Bijî berxwedana zîndanan” waşt rayraşîyayîşî rê dewam bikerê. Ciwanê ke raştê hêrişê polîsan ameyî xeylêk wext rayra şîyî. Rayraşîyayîş de îdarekarê HDPyî zî yê qeza zî tede xeylêk kesî ameyî destbendkerdene.