Hemserekê Meclîsê Kantonê Girê Sipî Sebrî Neboyî îfade kerd ke ê hêrişê dewleta tirke sey şerê qirkerdişî ercnenê û vat: “Dewleta tirke wazena hem Başûr de hem zî Rojawan de waranê îşxalî hîra bikera.”

Hemserekê Meclîsê Kantonê Girê Sipî Sebrî Neboyî derheqê hêrişanê dewleta tirke de ANFyî rê qisey kerd.

Neboyî ard ziwan ke dewleta tirke pê hemkarîya PDKyî nê hêrişan kena û îfade kerd: ”Nê hêrişî têna vera Başûrî nîyê, vera pêro kurdan ê. Ma nê hêrişan sey şerê qirkerdişî ercnenê. Dewleta tirke wazena hem Başûr de hem zî Rojawan de waranê îşxalî hîra bikera.”

Neboyî bale ante ser ke hêrişê artêşa Iraqî yê vera Şingalî mojneno ke Iraq mîyanê komployî de yo. Sebrî Neboyî vat: ”Mabênê Şingal û Rojawanî de dês virazîyeno. Rejîmê Şamî vera Şehba û Şêxmeqsûdî ambargo keno. Bi nê hawayî rejîm wazeno ke şarê Rojawanî bigêro binê ablûqa û sîyasetê vêşanîye ferz bikero.

Kurdan heta nika seba destkewteyanê xo bi des hezaran şehîdî dayî û ganî kurdî nînan bipawê. Îqtîdarê tirkan ho rijîyeno. Erdogan seba ke reyna weçînayîşî qezenç bikero şarî xapîneno. Seba azadî, asayîş û aramîya herême ganî pêro şarî vera hêrişanê îşxalî yê dewleta tirke vinderê.”