Endama Platformê ‘Ma Do Verê Kişîyayîşê Cinîyan Bigêrê’ Tuana Gençer ard ziwan: ”Têgêrayîşê cinîyan hende bihêz o ke îqtîdar nêeşkeno ey vindarno.”

Tuana Gençer derheqê qefilnayîşê platformî de ANFyî rê qisey kerd.

Gençere vist vîrî ke platform bi ‘vera qanûn û exlaqî xebatan kerdiş’, ‘binê pawitişê heqanê cinîyan de wazeno keyeyî çin bikero û keyeyan lete bikero’ yeno sûcdarkerdene. Gençere vat: ”Dosyaya dewa de delîlêko zelal çin o. Ma 12 serrî yo vera şîdetê serê cinîyan têkoşîn kenê. Ma kerd ke çîyo sey ‘cînayetê eşqî û namusî’ çin o û nê cînayetê cinîyan ê. Netîceya têkoşînê ma de ewro Wezîrîya Keyeyî zî doneyê cînayetanê cinîyan gêna. Hende têkoşînî ra dima xora ma na dewaya venge qebul nêkenê. No vera ma tedaya verêne nîyo û kerdişê winasênî nêeşkenê verê têkoşînê ma bigêrê.”

Endame Tuana Gençer qiseykerdişê xo wina tim kerd: “Ewro her warê cuye de cinîyî estê û seba heqanê xo têkoşîn kenê. Îqtîdar pê ney qayîl nîyo. La na saete ra pey îqtîdaro sîyasî nêeşkeno têkoşînê cinîyan bigêro. Têgêrayîşê cinîyan hînî bihêz o. Nê îqtîdarî seba ke peynîya ci ameya, Peymana Stenbolî fesh kerde, cinîyî bi hawayêkê bêhuqûqî destbend kerdî. Îqtîdar keno ke ma bitersno. Ma do na dewaya qefilnayîşî teqîb bikerê. Na dewa vera pêro têgêrayîşanê cinîyan a. Ma venga pêro cinîyan û rayaumûmîye danê ke wa wayîrê komeleya ma vejîyê. Nê teda û dewayî qetî do ma asteng nêkerê.”