Şingal de komxebata ke bi destê Têgêrayîşê Azadîya Cinîyan ê Êzidîyan (TAJÊ) organîze bîye de ame vatene: ”Seba azadîya Rayber Apoyî destê ma ra çi bêro ma do bikerê.”
Merkezê Şingalî de hetê Têgêrayîşê Azadîya Cinîyan ê Êzidîyan (TAJÊ) ra bi şîarê ‘felsefeya Rayber Apoyî bingeyê azadîya cinîyan ê êzidîyan o’ komxebatêke ameye kerdene. Pêro endamê dezgehanê Îdareyê Xoserî tewrê komxebate bîyî.
Komxebate de derheqê Rayberê Şarê Kurdî Abdullah Ocalanî de sînevîzyonêk ame mojnayene. Teberê welatî ra xeylêk cinîyan ê êzidîyan mesajî şawitî komxebate.
Verî Vervatoxa TAJÊ Sabîha Sebrî qisey kerd: ”Fikr û felsefeya Rayber Apoyî ma rê roşnî ya. Cinîyanê Şingalî ser o xeylêk planî estê. Nê hetî ra na komxebate zaf girîng a. Ganî bizanîyo ke ma cinîyê verê 2014î nîyê. Ma hînî planê dişmenî qebul nêkenê.”
Dima mesajê Meclîsê Cinîyan ê Êzidîyan ê Almanya ameyî wendene.
Endama Koordînasyonê TAJÊ Rihame Heco zî komxebate de qisey kerd ke felsefeya Abdullah Ocalanî û yê êzidîyan têdûştîye ser o ronîyayê. Endama Dîplomasîya TAJÊ Suhame Singalî îfade kerd ke Rayberê Şarê Kurdî cayêko girîng cinîyan rê peyda kerd û vat: ”Rayber Apoyî şorişê Kurdistanî kerdo şorişêko komelkî.”
Hemsereka Heyetê Îdareyî yê Şingalî Rihame Hesen da zanayene ke cinîyê êzidîyan bingeyê fikranê Rayber Apoyî de xoserîya xo ya demokratîke awan kenê.
Peynîya komxebate de cinîyan pare kerd ke ê do tim seba azadîya Ocalanî têkoşînî berz bikerê. Komxebate bi slogananê ‘Biciwîyo Serek Apo’, ‘Cinîye, Cuye, Azadîye’ qedîyaye.
