Dewa Ekîrekî ya Çemişgezekî de Sultane Gulbez vera projeyê madenî nêrazîbîyayîşê xo musna û vat: ”Ma dewa xo de maden nêwazenîme. Eke maden bêro ma nêşîkînîme heywankarîye û zîretî bikerîme.”

Dêrsim de her roje ju ocaxê madenî yeno akerdene. Dêrsim de nika 145 projeyê madenî est ê û temamîyan Koyê Munzurî sey warê madenî ameyî îlankerdene.

Dewa Ekîrekî ya qezaya Çemişgezekî ya Dêrsimî zî sey warê madenî ameye îlankerdene. Dewije Sultane Gulbez derheqê babete de PÎRHA rê qisey kerd.

Sultane Gubez ard ziwan ke ê wazenê dewa xo de biciwîyê û dewe de maden nêwazenê. Sultane vat: ”Ma îta de heywankarîye, hingdarîye û zîretî kenîme. Eke dewa ma de maden est bo ma nêşîkînîme îta de biciwîyîme. Darê ma vêşenê, erdê ma de ocaxê madenî abenê la kes wayîrê ma nêvejîyeno.

Serra 1994î de ma nê çîyî dîyî, bomba û madeyê kîmyewîyî erzîyayî îta. Ma wazenîme îta de biciwîyîme. La eke îta de maden est bo nêweşîyî zêdîyenê. Domananê ma zanîngeh qedînayo. Kar çin o coka ê do bêrê dewe de heywankarîye bikerê. Coka ma dewa xo de maden nêwazenîme.”