Endama Ronayoxe ya Platformê Cinîyan ê Şahmarane Gulîzare Îpeklî da zanayene ke seba Aysele Tugluka ke rixmê nêweşîya xo zî vera nêdîyena xebatê înan dewam kenê.
Sîyasetmedara kurde Aysele Tugluka ke 6 serrî yo zîndan de sey rehîne tepişîyena rixmê nêweşîyanê xo yê giranan zî vera nêdîyena.
Endama Ronayoxe ya Platformê Cinîyan ê Şahmarane Gulîzare Îpeklî ANFyî rê derheqê xebatanê înan ê seba Tugluke de qisey kerd.
Gulîzare Îpeklî pare kerd ke înan 2ê çeleyî de bi beşdarîya xeylêk rêxistin û platforman kampanya daya destpêkerdene. Gulîzare da zanayene ke Dezgehê Tipê Edlîyî (ATK) biranê sîyasîyan dano û vat: ”No sîstem ne qanûnanê xo ne zî qanûnanê mîyanneteweyîyan ano ca. Ma şexsê Aysele Tugluk de seba pêro tepişteyanê nêweşan azadîye wazenê. Seba ke Aysele Tugluk hemsereka verêne ya sîstemê hemserekîye bîye yena hedefkerdene. Aysele Tugluk têna seba cinîyanê kurdan nê seba pêro cinîyan bi serran têkoşîn kerd.”
Îpeklîye îfade kerd ke ê xeylêk platforman de seba Aysele Tugluk kampanyayanê îmza û agahdarkerdişî kenê û vat: ”Ma twitter de tagê ‘Aysele Tugluk rê azadîye’, ‘Seba Aysele Tugluk edalet’ akerdî, sîteyêke naye ro û na sîte de nuşteyê serê Tugluke weşanayî. Ma bi 8 ziwanan metnêk amade kerd, kampanyaya îmzayan daye destpêkerdene. Ma CPTyî rê mektubêke şawite. Nê dezgehî agêrayî ma la tira netîceyêke nêvejîyaye. Ma waştişnameyî şawitî Wezîrîyanê Edalet, Karanê Zereyî û Weşîye. Ma do seba Tugluke hîna zaf çalakîyan bikerê.”
