Polîsan hêrişê keyeyê Şenyaşaro ke verê Edlîyeya Riha de nobeta edaletî de bi kerd.
Emîne Şenyaşar û Ferît Şenyaşar roja 358. de verê Edlîyeya Riha de nobeta edaletî rê dewam kenê. Keyeyê Şenyaşarî roja 357. de nobeta xo kiriştbî verê Mehkemeya Dîlokî la uca de zî berê edaletî înan rê amebi qefilnayene. Polîsan waşt ke waro ke sey kuçeyê edaletî yê Şenyaşaran zanîyeno bêro vengkerdene. La Ferît Şenyaşarî no qebul nêkerd. Şenyaşarî vat: ”Hînî ma do verê bînaya edlîye de ronişê.”
Polîsan waşt ke fotografê qirkerdişê nêweşxaneyî bêrê wedaritene, nobete bêra qedînayene. Emîne Şenyaşar polîsan rê vat ”Ma zî bierzê zîndanî, lajê mi zîndan de yo.” Polîsan gefê vera keyeyî rê dewam kerd. Ferît Şenyaşarî ney ser o vat: ”Keyeyê şima ra 3 kesî biameyêne kiştene şima do keyeyê xo de roniştêne?” Polîsan bê sebeb xîret kerd ke her kes baxçeyê edlîye ra vejê teber. Emîne Şenyaşar pê lawikan nêrazîbîyayîşê xo mojna. Polîsan hêrişê muxabîrê Ajansê Mezopotamya zî kerd.
Ferît Şenyaşarî da zanayene ke înan vizêr waştişnameyê xo da mehkeme û vat: ”Ma ewro reyna tîya de yê. Verî destûr nêdîyayêne ke ma verê bînaya Edlîyeya Riha de nobete bigêrê. 4 serrî vîyartî la hema zî qirkerdişê nêweşxaneyî ra çew nêtepişîya. Heta edalet bêro caardene ma do verê edlîye ra meşorê. Heq, huqûq, edalet qetî rojêke do bêrê caardene.”
Ferît Şenyaşarî pê telefonê xo serebût qeyd kerd û rixmê hêrişê polîsan zî keye nobete rê dewam keno. RIHA
