HDP seba krîzê Ukrayna xîretê xo yê aştîye rê dewam keno. Heyetê HDPyî Temsîlkarê Payeberzî yê Karanê Teberî yê Ewropa û Polîtîkaya Asayîşî Josep Borrellî reyde ronişt.
Heyetê Partîya Demokratîke ya Şaran (HDP) ke tede Mîthat Sancar, Hemvervatoxê Komîsyonê Karanê Teberî Feleknase Uca û Hîşyar Ozalp, Temsîlkarê Ewropa Dervîş Çîmen estbîyî Josep Borrellî reyde ronişt.
Sancarî pêvînayîş de vat ke seba ke krîzê Ukrayna çareser bibo HDP destek dano pêro xîretanê aştîye û dîplomatîkan. Sancarî venga pêro terefan da ke meseleyan bi dîyalog û muzakereyan çareser bikerê.
Pêvînayîş de têkilîyê Tirkîya-Ewropa, demokrasî, meseleya kurdan, hêrişê vera HDPyî, dewaya qefilnayîşî, weçînayîşê Tirkîya û xebatê îtîfaqî zî ameyî ercnayene.ANQARA
