Hemsereka Pêroyî ya HDPyî Pervîn Buldane kongreya partîya xo ya Mersînî de qisey kerd û vat: ”Wextê ci ameyo ke ma pîya şorê û mil bi mil aver şorê.”
Hemsereka HDPyî Pervîn Buldane kongreya 4. ya rêxistina HDPyî ya Mersînî de qisey kerd. Endamê Partîya Xelisîyayîşî ya Newe ra Sosyalîste (SYKP), Meclîsê Mayanê Haştîye, temsîlkarê rêxistinanê komelê sivîlî û partîyê sîyasî beşdarê kongre bîyî. Pervîn Buldane kongre de qisey kerd û xeylêk babetî ercnayî.
Qiseykerdişê Buldane ra beşêk wina yo:
”HDP sîyasetê Tirkîya de tek çare ya. Armancê îqtîdarî tarîtî, zulm û zorbazî yo. HDP verê îqtîdarî de astengîyêka tewr pîl a. Coka îqtîdar hêrişê ci keno.Ma 8ê Adare û 21ê Adare de zî do meydanan de bibê û ê do hêzê îqtîdarî bivînê. Hesabê înan ê şaşî do abigêrê înan. Ê pê dewayanê kumpasî xîret kenê ke verê HDPyî bigêrê. Eke eşkenê wa weçînayîşan de vejîyê verê ma. Şima se kenê bikerê do nêeşkê ser bikewê.
Tirkîya de krîzo ekonomîk, faturayê berzî zêdîyenê. No şerm îqtîdarî rê bes o. Nika wext wextê pîya rayraşîyayîşî yo, wext wextê pîya averşîyayîşî yo. No îqtîdar derd û waştişanê şarî xem nêkeno. Meseleyanê tewr pîlan ê nê welatî ra yew zî meseleya kurdan a. Sere de Zîndanê Îmrlaiyî de xeylêk zîndanan de tecrîd û bêhuqûqîye estê. Ganî seba çareserkerdişê na mesele ganî kurdî û HDP sey muxatabî bêrê girewtene. Bê kurdan, HDP û Îmrali meseleyî çareser nêbenê. Ganî her kes naye bizano.”
Peynîya kongre de Bedrîye Kuş û Hoşyar Sariyildiz bîyî hemserekê neweyî yê HDPyî yê Mersînî. MERSÎN
