‘Seba Aysel Tugluke 1000 Cinîyî’ ra Dîlek Gokçîne pare kerd ke seba Tugluke ê rehme nêwazenê la huqûqê heqanê merdiman wazenê.
Sîyasetmedara kurde Aysel Tugluka ke Zîndanê Kandira de tepişîyena rixmê nêweşîyanê xo yê giranan û raporê Fakulteyê Tibî yê Unîversîteya Kocaelî zî pê raporê ‘eşkena zîndan de bimana’ yê Dezgehê Tipê Edlî vera nêdîyena.
Seba Aysel Tugluke kampanyaya ”Seba Aysel Tugluke 1000 Cinîyî” dîyabî destpêkerdene. Heta nika her cayê dinya de bi hezaran cinîyan îmza daye kampanya.
Kampanya ra Dîlek Gokçîn ANFyî rê qisey kerd.
Gokçîne vist vîrî ke Tugluke 26ê kanûna 2016î de tepişîyabî, mergê dadîya ci ra serrêke pey 2017 de rewşa ci bîye xirabêre. Gokçîne vat: ”Komêka barbaran hêrişê cenazaya dadîya Aysel Tugluke kerd û no verê çimanê Aysele de qewimîya. No Aysele rê bi travmayêka pîle. Xora tay merdiman zanayêne ke rewşa Aysele hol nîya. La Aysele sey tepişteyanê nêweşan ê bînan nêwaştêne nêweşîya ci biba rojdem. Ma sey pawitoxanê heqanê merdiman mîyanê xo de qisey kerd ke eşkenê çi bikerê la seba ke Aysele nêwaşt ma bêveng mendî.
30ê tebaxe de hêverî Nûpel de Muslum Yucelî rewşa Aysele ser o nuşt. Ma sey têgêrayîşê cinîyan ra çend cinîyan babete ser o nîqaşî kerdî. 2ê çeleyî de ma na kampanya daye destpêkerdene. Verî Avûkata Aysele Reyhane Yalçindag agahîyî dayî ma. Ma roja diyîne de 1000 ra zêder îmzayî arê dayî. Nika 54 welatan de cinîyan seba Aysele îmza daye.”
Dîlek Gokçîne îfade kerd ke ê seba Aysel Tugluke rehme nêwazenê û vat: ”Wext ke ma vanê ‘Aysel Tugluke rê Azadîye’ ma holîye yan zî rehme nêwazenê. Eqsê ci ma huqûqê heqanê merdiman wazenê. Çunke veradayîşê tepişteyanê nêweşan mewzuatanê neteweyî û mîyanneteweyîyan de heqêk o.” STENBOL
