Wendekaranê Unîversîteya Çewlîgî waşt problemê asyîşê ke wargehê wendekaran de qewimîyenê wa helêke cuwa ver bêrê çareserkerdene.

6ê kanûne de camêrdêko hêrişkar pê kardî dekewtbi zereyê Wargehê Wendekaran ê Cinîyan ê Pîr Alîyî yê Çewlîgî û wendekarê cinîyî tacîz kerdîbî. Wendekaranê Unîversîteya Çewlîgî vizêr waşt vera nê qewimîyayîşî eşkerayîye bidê. Walîtîye destûr nêda ke eşekerayîye verê banê wargehî de bêro dayene. Naye ser o wendekaran banê EGÎTÎM SENî de eşkerayîye daye. Pîya bi HDPyî partîyê sîyasîyî û wendekarî tewrê eşkerayîye bîyî.

Eşkerayîye bi nameyê wendekaran hetê Necle Başak ra emeye wendene. Başake vist vîrî ke 1ê kanûne de embazêke înan wargeho ke qala yena kerdene dinyaya xo bedilnaye û vat: ”Hema ke wendekarî tesîrê nê dejî ra nêvîyayî di camêrdî kewtî wargeh û qal eştî cinîyan. Coka qesawetê ma her roje zafêr benê. Ma xo asayîş de hîs nêkenê. Ma îdareyê wargehî rê qala problemanê xo kerde la înan çîyêk nêkerd. Problemê asayîşî esto ke ganî cade bêro çareserkerdene.”

Başake waştişê wendekaran wina rêz kerdî: ”Wargehê ma yo ke merkezê bajarî ra dûrî de yo ganî kampus rê ya zî nêzdîya ci rê bêro kiriştene. Heta ke no bêro çareserkerdene ganî wendekaran rê xizmetê rayîrî yo bêpere bêrodayene. Ganî derheqê personelanê wargehî de cipersayîş bêro destpêkedene û asayîş bêro zixmkerdene. Wa dormeyê wargehî bêro roşnkerdene, kamareyî bêrê cakerdene û kozîkê asayîşî bêrê viraştene. Embaza ma Şîfanura ke yeno îdîakerdene ke xo kişto, ganî mergê aye her hetî ra bêro roşnkerdene. Ma sey wendekaran ê cinîyan wazenê ke vera zext, îstîsmar û tacîzî yê ke ma her ca de raştê înan yenê, wa tedbîrî bêrê girewtene. Ma reyna vanê ke ma xo asayîş de hîsnêkenê. Ma warê perwerde û cayê mendişî yê biweşî û biasîyîşî wazenê.” ÇEWLÎG