Ewro 20ê Teşrîna Peyêne Roja Heqanê Domanan ya Dinya ya. Neteweyê Yewbîyaye seba heqê domanan bipawî, bi îmzeya 196 welatan no Peyman îmze kerde. Tirkîya zî serra 1990î de peyman qebul kerde û 1995î de peyman ca arde.
Her çiqas ke Tirkîya peymane qebul bikera û îmze bierza peymane zî welatanê ke tewr zêde ci de heqê domanan yeno binpaykerdiş ra yewe ya. Goreyê raporê ke Şûbeyê Amedî ê Komeleya Heqê Merdiman (ÎHD) hadre kerde, dewleta tirke 10 serran de 228 domanî kişta. Goreyê raporê Komîsyonê Heqê Domana yê Partîya Demokratîke ya Şaran (HDP) zî Tirkîya de zêdeyê 2 mîlyon domanî xebetîyenê. Goreyê raporê ke 8 serranê peyênan zî 513 domanî bîyî qurbanê karî.
Amed
Şubeyê Amedî yê ÎHD)yîseba Roja Heqanê Domanan ya Dinya eşkerayîyêke daye. Hetkara Hemserekanê ÎHDyî yê Amedî Ezdî Silademîr eşkerayîye wende.
Silademîre nê agahîyî dayî: “Mabênê 10 serran 2011-2021î de se ra 22ê ci kênayî 228 domanî hetê hêzanê dewlete ra ameyî kiştene. Nînan ra 30 domanî 0-5 serre bîyî. 64 domanî pê guleyanê hêzanê leşkerîyan, 62 domanî zî teqayîşanê bomba de kişîyayî.”
Îzmîr
Merkezê Heqanê Domanan yê Baroyê Îzmîrî zî bînaya xo de eşkerayîyêke daye. Avûkate Bahare Batikan eşkerayîye wende û vat: “Senî ke heta nika vera îstîsmar û binpaykerdişê heqanê domanan ma têkoşîn kerd nika ra pey zî do têkoşîn bikerê û dewayanê serê nê babetan teqîb bikerê.”
