Qurbanê Qirkerdişê 10ê Teşrîna verêne Anqara de ameyî yadkerdene. Çalakîye de ame vatene ke ê do destûr medê dewaya qirkerdişî bêra qefilnayene.
Menga 73. de Qurbanê Qirkerdişê Garî yê 10ê Teşrîna Verêne ameyî yadkerdene. Merdimê qurbanan û gazîyanê qirkerdişî tewrê merasîmî bîyî. Merasîmê yadkerdişî de semedê qurbanan deqayêk rêz ame girewtene û sloganê ’10ê Teşrîna Verêne do vîr a nêşoro nêro vîrakerdene’ ame vatene.
Sereka Komeleta Haştîye ya 10ê Teşrîna Verêne Mehtape Coşkun merasîm de qisey kerd û pare kerd ke ê wazenê verê Garî de peykerê vîrardişî bêro viraştene.
Coşkune bale ante ser ke polîsî çalakîyanê yadkerdişî de hêrişê merdimanê qurbanan kenê û vat: “Ma do destûr medê dewaya qirkerdişî bêra qefilnayene.” ANQARA
