Cemxane û Kulturê Pir Sultan Abdalî yê Şûbeyê Amedî yê Qezaya Rezan yê Amedî 25ê kanûna 2011î de bi merasîmêk ameybî akerdene. Labelê Şîrketê Anonîmî yê Vilakerdişê Cereyanî yê Dîcle (Dicle Elektrik Dağıtım A.Ş.) bi mehneya faturaya cemxaneyî nêameya dayene, cereyanê cemxaneyî birna. DEDAŞ serra 2018î de cerayanê cemxaneyî birna û aye wextî ra nata cemxane de ceryan çin o. Her çiqas ke reaksîyon bêrî nîşandayene û derheqê babete de xeberî bêrî viraştene zî aye roje ra nata cereyanê cemxaneyî nêame veradayene.
Sewbîna vizêr nê perê Şîrketê Vilakerdişê Cereyanî yê Denîzlî, Mugla û Aydinî (AYDEM) cereyanê Merkezê Kultur û Cemxaneyê Koşke bi mehneya ‘Ganî dosya bêro newekerdene’ birna. Bado ke şar hedîse eşnawit seba şermizar kerdişê rewşe, verê awanîye de ame pêser. Çîyo ortax yê nê wirdî dezgeyan oyo ke wirdî zî cemxaneyî û caardişê hemverê înan yew o. Seba ke elewîyî caardişê winasî yenî sereyê înan û berê hemwelatijanê elewîyan zî yenî xêzkerdene û mergî reyde yenî tehdîtkerdene.
Zihnîyetê hemverê elewîyan tarîx ra nata nêbedilîyayo û sebebê caardişanê winasî zihnîyetê cabîyaye yê dewlet û selahîyetdaranê aye yo. Tarîxê osmanîyan ra nata her çiqas ke nameyê şexsan bibedilîyo zî zihnîyeto ke Qirkerdişê Dêrsimî viraşt û o ke cereyan birneno yew o.
Heta ke no zihnîyet nêbedilîyo do caardiş û muameyê cîyakerdişî yê winasî dewam bikerî. Seba vernîgirewtişê heme qetlîyam û caardişanê winasîyan, ganî merdim no zihnîyeto tehlukeyin bibedilno. Seba no bedilnayîşî, ganî karê ma yê yewine no bibo. Sebebê qetilkerdiş, taciz, tecawiz, şîdet û heme kerdişanê hemverê cinî û domanan zî no zihnîyeto lêşin ke xo mezgê merdiman de ca kerdo, yo. Ganî her cîyayê, reng û veng bicuyo. Ganî merdim hurmet nîşanê her cîyayeyan bido. Çimkî merdim bi xo zî çimane kesanê bînan de cîya asîyeno. Eke ti hurmet nîşan nêdî cîyayêyan, do hurmet to rê zî nêro nîşandayene. Eke ma yewbînan rê baş bibî, na dinya mirdê ma heminan kena. Senî ke Homa dinya de her rengan bicaa kerdo, ganî merdim zî hurmet nîşanê nê heme rengan û cîyayêyan bido. Nêbeno ke herkes bimano yewbînan. Dinyayêka winasî mumkin nîya. Dinya bi renganê cîyayan weş a.
