Tirkîya û Vakurê Kurdîstanî de krîzo ekonomîk pê tesîrê janî zî beno giranêr. Dêrsimijan ard ziwan ke meseleya tewr pîle bêkarî ya û vat: ”Merdimî nêeşkenê debara xo bikerê, kîrayî vay ê.”

Serekkomarê Tirkîya Recep Tayyîp Erdoganî zîyaretê Amerîka ra verî rewşa citkaran ser o qisey kerdbi û îdîa kerdbi ke citkarî rewşa xo ra kêfweş ê. Erdoganî semedê vayîya berheman zî vatbi ê do na vayîye kontrol bikerê. Dêrsimijan derheqê krîzî ekonomîkî û vayîya berheman de Pîrha rê qisey kerdî.

Hemwelatî Hasan Babayîgîtî vat: ”Halê her kesî pêrîşan o. Ciwanî bêkar ê. Wendekarî cara vayîya kîrayan ra semed mexdûr ê. Ciwanî bêkarîye ra şinê teberê welatî.”

Hemwelatî Mustafa Akdagî vat: ”Ma 150 TL danê la nêeşkenê yew poşet de bikerê. Kontrol çin o.”

Tahsîn Polatî vat: ”Kîrayî zaf vay ê. Wendekarî nêeşkenê keye bivînê bivînê zî nêeşkenê kîraya ci bidê. Tîya de kesê ke 4-5 hezar gênê nêeşkenê debara xo bikerê êyê ke meaşê asgarî gênê senî debara xo bikerê?”

Mehmet Turanî vat: ”Semedê zanîngehî 7 hezar wendekarî ameyê la 1500-2000 hezar wendekarî teber de mendê. Kîrayî vay ê. Eke şima hende wendekarî gênê semedê wargehê zanîngehî awanîyêke virazê.”

Ciwana bi nameyê Nazlicane Îlarslan vat: ”Ma pê ameyoxî qerqilîyenê. Kêmasîyê ma zaf ê.” DÊRSIM