Mamosteya MED-DERî Seyhan Şaşmaz dîyar kerd ke menga Êlule de perwerdeyê online yê rî bi rî dest pêbikerê û vat: “Muracatê kursê perwerdeyê bi kurdkî dewam kenê. Ma do bi lehçeyê kurmanci û kirmanckî perwerdê bidê. Xebatê ma yê seba tûtan zî do dewam bikerê û ma amanc kenê ke şar wayîrê ziwanê xo vejîyo.”
Komeleya Cigêrayîşî ya Ziwan û Kulturê Mezopotamyayî (MED-DER) Amed de xebata ziwanî keno, dimayê demêk derg do dest bi perwerdeyî rî bi rî bikero. MED-DER ke tewir bi tewir xebatê serê ziwanî de keno, prosesê pandemî de zî xebatê xo nêda vindarnayîş û bi prosesê pandemî dir xebatê xo bi rayîrê online serê bernameyê ZOOMî dabi dewamkerdiş. La menga Êlule de perwerdeyîyê xo hem bi hawayêke online hem zî bi rî bi rî do bido destpêkerdiş. Muracatê perwerdeyîyê dersan heta 3ê êlule do dewam bikero. Derheqê babete de mamosteyê MED-DERî Seyhan Şaşmaz qisey kerd
‘Muracatê kursê ma dewam ê’
Seyhane vernê de bale ant serê dersê onlîne û vat: “Wexto ke pandemî dest pêkerd, ma kewtî mîyanê cigêrayîşî. Ma zî waşt ke perwerdeyîyê xo yê ziwanî bi hawayêke online bidê dewamkerdiş. Seba dersê ma xeylêk muracatî virazyayî. Destpêkerdişê dersê online serê perwerdehîyê ma de zî tesîrêk baş kerd. Çike her ca ra muracat ame kerdiş. Êdî xeylê wendekarî dersê online wazenê bivînê. Seba ke heme kes Amed de nêciwîyeno. Ma do menga Êlule de dest bi perwerdeyîyê xo bikerê. Labelê ma do demêk dersê xo rî bi rî zî bidê û dersê xo yê online zî bidê dewamkerdiş. Muracatê kursê ma dewam kenê.”
‘Ma do dersanê xo bi lehçeyê kurmancî û kirmanckî bidê’
Seyhane wina dewam kerd: “Do dersê ma hem bi online bê û hem zî rî bi rî bê. La seba sewîyeya mamosteyî ma tena dersê rî bi rî danê. Ma dersanê xo bi lehçeyê kurmancî û kirmanckî danê. Seba tûtan zî kargehê ma estbî. Tûtî bi kêfweşî beşdarî nê kargehan bîne. Do kargehê ma yê seba tûtan dewam bikerê. Bi destpêkerdişê perwerdeyê ziwan, goreyê rewşe do tûtî êdî peynîya hewteyî de tewrê kargehan bibê. Coka ma do qeydê tûtan zî bigîrê û kargehê ma bi no şiklî dewam bikerê.”
‘Wayîrê ziwan, kultur û hunerê xo vejîyê’
Seyhane tewr peyîn wina vat: “Bi serran o teda û zorî serê ziwanê ma de esto. Ma qalê tûtanê xo kerd, qalê ziwanê xo kerd. Ma vanê ke wa keyeyî tûtanê xo bieşrawê verê ma. Gama ke ma vanê perwerdeyî ma tena gramerî nêkenê. Tîya kultur û huner zî esto. Seba nê zî kesê ke tewrê perwerdeyî ma benê hemverê teda û zordarî serê ziwanê ma de zî benê wayîrê helwest. Vengdayîşê mi oyo ke wayîrê ziwan, kultur û hunerê xo vejîyê.” AMED
