Li paytexta Iraq Bexdayê lûtkeya welatên cîranê Iraqê dest pê dike. Lûtke bi beşdariya welatên wekî Îran, Urdun, Erebistana Siûdî, Îmarat, Kuweyt, Qeter, Misir, Tirkiye û Fransayê li dar dikeve. Armanca li daxistina vê lûtkeyê ew e ku têkliyên Iraqê bi welatên derdorê re werin sererastkirin û piştî demeke dirêj dîsa Iraqê bikaribe li herêmê bibe xwedî gotin û rol.
Endamê Lijneya Têkiliyên Derve yê Iraqê Muxtar Mûsewî der barê lûtkeyê de daxuyanî da û wiha got: “Girîngiya vê lûtkeyê ji wê yekê tê ku welatên cîran dixwazin têkliyên xwe yên dîplomatîk bi Iraqê re ji nû ve çalak bikin û rûpelê nakokiyan bigirin”
Mûsewî di berdewamiya axaftina xwe de der barê nakokî û tevliheviyên bi welatên cîran re jî wiha got: “Gelek problemên Iraqê bi welatên cîran re hene. Wekî mînak gelek dosyayên nakok ên bi Tirkiyeyê re hene û divê lihevkirinek der barê hin mijarên bi nakok de çêbibe. Wekî meseleya Şengalê û bênavber topebarana artêşa tirk a li ser sînorê Iraqê, divê ev mijar bi riya diyalog û lihevkirinê çareser bibin.”
Li gorî daxuyaniyên rayedarên Iraqê lûtke bi giştî dê ji bo çalakirina dîplomasiya Iraqê û têkiliyên wê yên bi welatên derdorê re gavek baş be.
