Li bajarê Vuhan ê Çînê vîrûseke nû derket holê. Di kesên vîrûs li wan peyda bûye de enfeksiyona rêya hilmijînê tê dîtin. Ev vîrûs di nav çend hefteyan de bi lez û bez belav bû û ji bilî Çînê, di heman demê heta niha li zêdetirî 16 welatên din hatiye tespîtkirin. Mirinên bi sedema vê vîrûsê, her ku diçe jî zêdetir dibin. Vîrûsa Koronayê cara ewil di meha kanûna 2019’an de derket holê.
Bajarê Vuhanê ku cara ewil vîrûs lê hatiye tespîtkirin, niha di karantînayê de ye. Di çarçoveya pêşgiriyên tenduristiyê de, nayê hiştin ku 50 milyon kesên li van herêman rêwingiyê bikin. Nayê zanîn bê ka şewba vîrûsa koronayê şewbeke demkî ye yan dê domdar be. Ji bo pêşîlêgirtina belavbûna vê vîrûsê, li Çînê di serî de kesên bi vê şewbê ketin dixin karantînayê. Li van bajaran her wiha kafe, sînema, konser û eywanên pêşangehan jî heta demekê hatine girtin. Li bajarê Vuhanê rûpoş li her kesî hate ferzkirin, rêwitî hate sînordarkirin, kamerayên germa laş tespît dikin li balafirgehan hatin bicihkirin û bazara masiyan jî hate girtin. Li hêla din li gelek welatên cîhanê jî pêşgiriyên cur bi cur hatin wergirtin. Rêxistina Tenduristiyê ya Cîhanê (WHO) ji ber vîrûsa li Çînê derketî û li gelek welatên din jî belav bûye hişyariya ‘ji bo tenduristiya raya giştî ya navneteweyî rewşa lezgîn’da. Hêjayî bibîrxistinê ye ku herî dawî hejmara kesên ji ber vîrûsa koronayê li Çînê jiyana xwe ji dest dane derket 210’an. AMED
