Di van rojên dawî de dîsa bazareke nû li ser hesabê xwîna gelên Sûriyeyê tê kirin. Van rojan dîsa hêzên rejîmê û Rûsyayê êrîşên dijwar li ser Idlibê pêk tînin. Di heman demê de artêşa tirk û komên girêdayî wê li dijî gundewarên Helebê û bi taybetî li dijî Til Rifetê ku penaberên efrînî lê dijîn, êrîşên dijwar kirin.

Li gorî agahiyên ji malpera North Press sivîlên li Idlibê dijîn ji bêdengiya dewleta tirk aciz bûne û bi xwepêşandanan nerazîbûna xwe tînin ziman. Hikûmeta Tirkiyeyê ya ku bi dengekî bilind li hemberî êrîşên li ser Idlibê û deverên di bin kontrola wê de dikir li hemberî van êrîşên dawî bê deng e. Vê yekê rê li ber nerazîbûna gelê li wir dijî vekir û xelkê li Idlibê dijîn daketin kolanan û bang li Tirkiyeyê kir ku li hemberî êrîşên Rûsyayê bêdeng nemîne.

Lê wiha xuyaye ku bazara di navbera Rûsya û hikûmeta Tirkiyeyê de vê carê jî wiha ye. Yek li Idlibê bide û yê din jî li hemberî wê li Til Reifetê bide. Lewre jî herdu alî ji van êrîşan qayil in û kes ji wan dengê xwe li dijî yê din dernaxîne.

Mirov dikare bêje ku vê carê jî wekî hemû carên din bazar li ser xwîna gelên Sûriyeyê ye û êrîşên herdu aliyan ji berê plankirî ne û di encamê lihevkirinekê de pêk tên.

Navenda Nûçeyan