Baroyê Dêrsimî dewa Murat Yildizo ke Pulur de hêrişê hewayî de ame qetilkerdene cigêrayîşî kerdî û vat: ”Çira verî sewbîna kesan rê destûrê dekewtişê herême nêdîye la Yildizî rê dîya?”
Qezaya Pulurî ya Dêrsimî de ciwanê bi nameyê Murat Yildizî 7ê gulane de wextê operasyonî de pê bombayanê SÎHA û helîkopteran amebî qetilkerdene.
Heyetê Rayberdişî yê Baroyê Dêrsimî dewa Yildizî Kilmer zîyaret kerde û eşkerayîyêke daye. Goreyê eşkerayîye dewijan pare kerd ke leşkeran nêverdayêne çew şoro herêma operasyonî la têna destûr da Murat Yildizî. Eşkerayîye de ame parekerdene ke wesayîtê Murat Yilmazî tewr peyên 7ê gulane de saete 10.00-11.00 de dîya û zereyê wesayîtî de 4 tenî estbî û ame eşkerakerdene ke dima ke wesayît şi herêma operasyınî di teqayîşî qewimîyayî.
EŞkerayîye wina dewam kena: ”Goreyê şahîdan wesayît vêşa û wele bibi, serê ci de bi seyan rêçê guleyan estbî. Se ra 99 meyîtê zereyê wesayîtî aîdê Yildizî yo. La hema testê DNA nêame qetîkerdene. Keye wazeno ke êyê ke vanê ‘domanê şima merd’ wa cade doman bido.”
Eşkerayîye de selahîyetdaran rê nê persî ameyî persayene:
-Çira leşkeran nêverda çew şoro warê operasyonî la seba dekewtişê warî destûr da Murat Yildizî?
-Qetî dîmenê SÎHA û ÎHA estê. Nê dîmenî çira nênê parekerdene?
-Çira hema zî destûr nêdîyeno çew ke şoro warê herême?
-Çira derheqê serebûtî de agahîyê zelelî çin ê?
-Dewijanê nêzdîyan vat ‘2 teqayîşî qewimîyayî û oyo peyên vengê ci zaf berz bi.’ Nê teqayîşî senî qewimîyayî?
-Senî meyîtê merdiman ameyî nê halî ke nêşinasîyenê?
Baroyê Dêrsimî pare kerd ke ê do seba ke sûcdarî bêrê muhakemekerdene xîret bikerê. DÊRSIM
