Qezaya Pulurî ya Dêrsimî de ciwan Murat Yildiz herêma mabênê dewanê Axdad-Işikvuranî de hetê SÎHA û helîkopteran ra dîya bombayan. Leşkeran keyeyê Yildizî seba teşhîsê cenaza berd cayê bombardumanî.
Dewa Tîlekî ya qezaya Pulurî ya Dêrsimî de ciwanê bi nameyê Murat Yildizî seba arêdayîşê kilawekan pê wesayîtê xo keyeyî ra vejîya. Ciwan herêma mabênê dewanê Axdad-Işikvuranî de hetê SÎHA û helîkopteran ra dîya bombayan ver. Leşkeran babî û kekê Yildizî berdî cayê bombardumanî û cenazaya vêşayîye mojna înan ke wa teşhîs bikerê.
Dîya zanayene ke keyeyê Yildizî Dezgehê Tipê Edlîyî yê Meletî de do testê DNA bidê. Aqîbetê Murat Yildizî ser o hema zî eşkerayîyêke nêdîyaye. DÊRSIM
