Gulîstan Dokuye ra 471 rojî yo xebere nêna girewtene. Avûkatê keyeyê Dokuyî Alî Çîmenî ard ziwan ke dewlete wazena tehqîqatê Gulîstan Dokuye giranî ra bigêra û bi nê hawayî dewa bida vîrakerdene
Wendekara Unîversîteya Munzurî Gulîstan Dokuye 5ê çeleyê 2020î de Dêrsim de dîyaye vînîkerdene. Gulîstan Dokuye ra 470 rojî yo xeberêke nêna girewtene.
Avûkatê keyeyê Dokuyî Alî Çîmenî îfade kerd ke heta nika xebetanê cigêrayîşî ra netîceyêke nêvejîyaye. Alî Çîmenî da zanayene ke rixmo ke seba tehqîqatêkê hîrayî soz ame dayene 15 mengan de materyalê derheqê vergumanî de analîzî nêameyî kerdene.
Alî Çîmenî vist vîrî ke Gulîstane tewr peyêne pirdê Dînarî de dîyaye la hema zî dîmenê kamerayanê Dînarî nêameyî akerdene. Çîmenî vat: ”Meqamê tehqîqatî bi hawayêkê bêzerrî nêzdîyê nê serebûtî benê. Semedo ke rêxistinanê cinîyan û şarî têkoşînêko pîl da waştişê ma yê cigêrayîşî ame qebulkerdene. 1ê êlula 2020î ra nata dosyaya Gulîstan Dokye de qet yew averşîyayîşêk çin o. Waştişê ma nêameyî ercnayene.”
Çîmenî ard ziwan ke heta ke aqîbetê Gulîstane bêro eşkerakerdene ê do na dewa teqîb bikerê. Çîmenî vat: ”Dewleta wazena tehqîqatê Gulîstane giranî ra bigêra û bi nê hawayî dewa bida vîrakerdene. Coka ganî rayaumûmîye bi berdewamî pers bikera ke ‘Gulîstan Doku ça de ya.’ Ma do nêverdê ke na dewa bêra wedaritene. Ez pê xemgînî wazena vaja ke huqûqê zereyî hînî na dewa ra nêeşkeno tesîr bikero.” DÊRSIM
