HDPyî Çewlîg de kongreya îstîsnayîye ya 3. kerde. Kongre de Saadete Firat û Hasan Soysal sey hemserekanê neweyan ê Rêxistina Çewlîgî ameyî weçînayene

Rêxistina Partîya Demokratîke ya Şaran (HDP) ya Çewlîgî seba ke îdareyê xo yê neweyî biweçîna  Kongreya Îstîsnayîye ya 3. kerde. Kongre Merkezê Ciwanan ê Şaredarîye de ameye kerdene.

Wekîlê HDPyî Erdal Aydemîr, endamê Meclîsê Partî Murat Aydin, Îbrahîm Erdkul, Hetkara Hemserekanê Pêroyîyan a HDPyî Ozlem Gunduz, Partîya Deva, Partîya Ameyoxî, Partîya Saadetî û xeylêk hemwelatîyî tewrê kongre bîyî.

Kongre de verî mesajê Wekîlê verênî yê HDPyî Îdrîs Balukeno ke Zîndanê Sîncanî de tepişîyeno ame wendene. Balukenî mesajê xo de wina vat: ”Cinîyê rûmetênî û embazê ciwanî, prosesê nikayênî de  demokrasî û azadîye binê gefanê cidîyan de yê. Ma eşkenê pê paştdayîşî welatê demokratîkî awan bikerê. Nê prosesê zehmetî de ez embazanê îdarekaran fîraz kena û îdareyê neweyî rê serfîrazî wazena.”

Wekîlê HDPyî yê Çewlîgî Erdal Aydemîrî zî pare kerd ke tedayê vera HDPyî,tepişîyayîşê wekîlan, tayînê qeyûman darbeya îqtîdarê AKP-MHPyî ya. Aydemîrî vat: ”Ganî meseleya kurdan cade rewşa aramî, demokratîke û haştîyane de bêra çareserkerdene. Ma ganî binê her şert û mercî de hetê azadîye, haştîye û têdûştîye bigêrê. Îdîanameyê vera partîya ma hetê Mehkemeya Qanûnê Bingeyî ra ameyî redkerdene. Têkoşînê kurdan mîyanê her şert û mercî de do dewam bikero.”

Kongre de Saadete Firat û Hasan Soysal sey hemserekanê neweyan ê Rêxistina Çewlîgî ameyî weçînayene. ÇEWLÎG