Ayşe Şan deyîrbazêka nimûne ya; çimkî hetêk ra keyeyê aye, hetêk ra zî pergalî (sîstemî) aye rê zilm û teda kerdî. Ayşe Şane vera zîhnîyetê zilmkerdî xover da û bîye “Eyşana Kurdan”. Bi serran ra dima gorê aye ame Amed û wesîyetê aye ame ca.
Ayşe Şan deyîrbazêka Kurde ya ke bi nameyanê sey Eyşana Kurd, Ayşe Xan û Eyşana Elî yena şinasnayene. Sey kênaya deyîrbazêkî Amed de ameye dinya; labelê şaristananê sey Dîlok, Stenbol, Almanya, Bexda û tewr peynî zî Îzmîr de ciwîyaye. Bi vatişê deyîranê tirkî û kurdkî radyoyan de xebitîya, konserî dayî û kasetî viraştî. Keyeyê aye nêwaştêne ke a bi muzîkî reyde elaqedar biba; tena maya aye nê warî de hetkarî daye aye.
Wesîyetê aye o bî ke eke rojêk şêra heqîya xo ser (bimirî), wa cenazeya aye agêra Amedî. Almanya de aye domanêk kerd vindî û dima ra hirê domanê aye bîyî.
Bêçareye koç kerd
Seba ke keyeyê aye nêwaştêne a bi muzîkî reyde elaqedar biba, aye bêçare Amed ra koçê Dîlokî kerd. Çunke a game deyîrê kurdkî qedexe bîyî, aye bê çareyî deyîrê Tirkî vatî. Serra 1963î de seba problemanê ekonomîkan Dîlok ra koçê Stenbolî kerd. Stenbol de dest bi deyîranê kurdkî û tirkîyan kerd. Sîfte bi deyîra “Ez Xezal im” namdar bîye. Peynî de zî kasetê xo yo yewin o kurdkî-tirkî vet. Namdarbîyayîşî ra dima, seba ke teda û zilm zêdîyayî, na reye bêçare Tirkîya ra koçê Almanya kerd. Labelê uca de çi heyf ke 18 aşman ra dima kêna xo Şahnaze kerde vindî.
Dima ra hirê domanê aye bîyî û aye agêraye Stenbolî. Seba ke deyîrê kurdkî vatêne, yew het ra keyeyê aye, hetê bînî ra zî hêrîşê pergalî (sîstemî) dest pêkerdî. Serra 1979î de şîye şaristanê Bexdayî yê Iraqî û uca de Radyoyê Vengê Bexdayî de bi nameyê Eyşana Elî vengê xo resa her ca. Şaristananê Bexda, Musul, Hewlêr û Duhok de konserî dayî.
Çi heyf ke 18ê Kanuna 1996î de Îzmîr de nêweşîya qanserî (ganwerî) ra dinyaya xo bedilna. Aye zaf waştêne Amed de bêro definkerdene, labelê a game keyeyê aye destûr nêda. Gorê aye heta nika Îzmîr de bî.
Wesîyetê Ayşe Şane ame ca
Goreyê wesîyetê Ayşe Şane, 29 serrî ra dima cenazeya aye bi pêşengîya Şaredarîya Şaristanê Girdî ya Amedî ameye ardene. Hunermendanê Kurdan û temsîlkaranê şaredarîye cenazeya Ayşe Şane Goristana Yenîkoyî ya Rezanî de bi merasîmekî gird kerdî defin kerdî.
Seba caardîşê wesîyetê Ayşe Şane; wekîlê DEM Partî, hemserekê şaredarîyan, hunermendî, roşinbîrî, temsîlkarê saziyan, kesê ke keyeyê Ayşe Şane ra yê û xeylê welatijî merasîm de ameybî pêser.
