Heyetê Îmraliyî yê Partîya Têduştî û Demokrasî ya Şaran (Partîya DEMî) Pervîn Buldane, Mîthat Sancar û Endamê Buroyê Huqûqî yê Asrinî Faîk Ozgur Erol, Serekê Pêroyî yê MHP’yî Devlet Bahçelîyî dir pêvînayîş kerd. Pêvînayîşo ke Meclîs de virazîya, Bahçelî û kesê ke ey reyde bîyî, heyet vere berî de pêşwazî kerd. Dima ke fotograf û dîmenî dîyayî çapemenîye, pêvînayîş odaya Meclîsî ya Bahçelîyî de çapemenîye ra girewte dewam kerd.
Pêvînayîşî ra dima Pervin Buldane û Devlet Bahçelîyî yew-yew eşkerayîyî dayî. Pervin Buldane ard ziwan ke pêvînayîş zaf pozîtîf vîyarto û va: “Ma derheqê pêvînayîşê Îmraliyî yê 2’yê Kanûne û muneqaşeyê ke dima qewimîyayî de, Birêz Bahçelî û heyetê ey haydar kerdî. Ma behsê qademeyanê prosesî kerd. Seba çiyo ke naye ra dima lazim o bêro kerdene, ma îstîşareyî kerdî. Pêvînayîşêko zaf muhîm û ercaye bi. Ma fikirînîme ke qademeyo ke proses ameyo ci, lazim o serê zemînêkê neweyî û qademeyêkê neweyî ra dewam biko. Gereka ma vajî ke ma vîyarteyî qademeyê diyînî. Qademeyê diyînî de zî hewcetî bi zemînêkê qanûnî û huqûqî est a. Hewceyî bi serrastkerdişêkê qanûnî est a. Helbet gereka qanûnê aştîye bibo, ma wazenî naye xusûsî îfade bikerî. Naye ra dima xebatê ke hem komîsyon hem zî partîyê sîyasîyî do bikerê, nê daraxî de muhîm ê. Coka ma fikrayê xo resna Birêz Bahçelîyî. Ma derheqê qanûnan de pawitişê xo ey rê vatî, ma hetkarîya ey waşte. Xora hetkarîyê Birêz Bahçelîyî serê prosesî ra nata zaf ercayeyî bîyî, ma bi zerrî û can bawer kenî ke naye ra dima zî do bibê.”

‘Ez her cumleye aye ra îmze kena’
Bahçelîyo ke qisey kerd zî vat: “Pervîn Xanime her babete bi akerde îfade kerd. Ez her cumleyê aye îmze kena.”