Cinî rengê cuye ya. Bi heskerdişê xo, weşdîtişê xo, îradeyê xo, sebrê xo, edaletê xo, viraştoxîya xo, pawitoxî û aştîwazîya xo cuyînî xemelnena. Pergala pederşahe ke zehfrengî ra, têduştî û aştî ra tersena bi destê mêrdan wazena cuya komelî goreyê waştişê xo eyar bikero.

Tarîxa şîdetê mêrdî yê serê cinî bi awanbîyayîşê pergala pederşahî ra dest bi ci kerdo. Têduştîya ke dewrê seydvanî-komkerdoxî de mîyanberê cinî û mêrdî de bîye, bi amyayîşê dewrê zîret û bazirganî dir açarya serdestî û bêedaletîya mêrdî ser. Mêrdeyê ke tenê destê înan de qewetê înan û aletê ke pê heywanî kiştêne bîyê dimayo ke însanî derbasê cuya cabîyayeyî benê û bazirganîya heywanan heta ê zîretî kona destê înan cinîyan ser de hikmê xo ronenê û şîdetê xo dest pê kenê. O şîdetê înan heta roca ma ya eyroyêne zî dewam keno. Welatanê ke tede zîhnîyetê pederşahî serdest o de cinî rê cuye cehenem a. Çi heyf ke Tirkîya zî ê welatan ra yew a ke zîhnîyetê pederşahî serdest o û hukmê edaletî yê pergale çimanê xo şîdetê mêrdî yê serê cinî ra gêno, nê sebebî ra zî hema vace her roc qetilkerdişê cinîyan yeno şinawtiş. Heta wina bîyo ke tenê kiştişê cinîyan de nêmanenê, henî mêrdan ra ke qayîşê însanetî xo ra visnayo, bi fikro ke ceza bidê hemsera xo tûtanê xo yê qican ê mehsuman zî kişenê. Mêrdeyo ke pederşahî ruh û zîhnîyetê ey dagir kerda cinî zey mal û îtaetkara xo vîneno. Loma wexta cinî hemverê tundîya ke hemserê aye serê aye de pêk ano vecîyo rastê heme awayî şîdetê mêrdî yena. Mêrdeyo ke xo serdest, hêzdar û serê cinî ra vîneno vare ke cinî sey hemsere, hemcuye û hemraye xo bivîno, aye sey kole, xizmetkar û mecbûre xo vîneno. Loma wazeno cinî binê emrê ey de bo, hemverê zilm û şîdetê ey bêveng bimano û milê xo kerdişanê ey rê rono. Ma eşkenê vacê ke mêrdeyê ke di nê zêhnîyetî de yê zehf tira zî cesaret na pergale ra gênê. Ey zanê ke hukmê edaletî yê na pergale paşta înan de yo û her şîdeto ke hemverê cinî pêk bîyarê bêceza maneno. Loma cinîya ke sebebêke yan çend sebeban ra biwazo heskerdeyê xo ra têra bibo yan zî bi awayêke têra bîya hetê ey ra yena kiştişî, cinîya ke sebebêke yan çend sebeban ra veradayîşê xo hemserê xo ra wazena yan zî eşkawa xo ey ra bido verradayîşî hetê ey ra yena kiştiş. Helbet kiştoxê cinî tenê hemserê aye nîyo, kiştoxê aye reyreyan pîyê aye, birayê aye, mam û xalê aye yo zî. Heta mêrdeyî na yewe ra zî cesaret gênê, bêters û xo ra pêbawer benê, loma bi rehetî her qayde şîdet ro cinîyan kenê.

Rast a, welatê ke mîyanê xo de têduştîya zayendîya komelkî rûnaya estê la cinî kam heb welatî de bena wa bibo, baro giran ê cuyî milê aye ser de yo. Pîzeyê xo de weykerdişê tûtan, ardişê înan ê dinya, pîlkerdişê înan heme îrade û sebrêke zêde wazenê ke herdi zî cinîyan de est ê. Cinî zerrezîz û zerretenik a. Cinî hetê îrade û sebrî de xurt a, xozahez û aştîwaz a. Cinî awankara keyî û komelî ya. Aye ke şekil dana komelî cinî bi xo ya. Hetê aye yê sosyalî û psîkolojîkî çiqas baş bo eşkena komelê xo zî hende başêr bikero.

Cinî rengê cuye ya. Bi heskerdişê xo, weşdîtişê xo, îradeyê xo, sebrê xo, edaletê xo, viraştoxîya xo, pawitoxî û aştîwazîya xo cuyînî xemelnena. Pergala pederşahe ke zehfrengî ra, têduştî û aştî ra tersena bi destê mêrdan wazena cuya komelî goreyê waştişê xo eyar bikero.

Cinî vengê azadî ya. Vatişê cinî aştî ya, têduştî ya, edalet û cesaret a. Na pergala ke azadî ra tersena wazena cinîya ke hemverê bindestî, şîdetî û kedwerî timî vengê xo vecena û neheqî qebûl nêkena bi destê mêrdan bido tersnayîş û bêveng verdo. Pergala dagirker a serdeste zana ke bêvengkerdişê cinî bêvengkerdişê azadî yo. Pergala dagirkere estbîyayîşê xo bi kedwerî û qedexeyan domnena loma cinîya azadîwaze ra tersena. Komelêke çiqas azadî û aştî ra dûrî bo emrê pergala kedwere hende derg beno.

Nê sebebî ra ma eşkenê vacê ke eyro roc Tirkîya de bi nê awayî hetê mêrdan ra zêdebîyayîşê kiştişê cinîyan polîtîk o.

Ma bi munasebetê 25ê Teşrîna Peyêne wayanê Mîrabalan bi hurmet anê xo vîr û înan ra vanê; şima rehet rakoyê, cinîyê kurdan têkoşîna şima domnenê.