Rêber Apo rêya azadiyê heta dawiyê ji jinan re vekir. Bi fikir û îdeolojiya xwe vê rêyê ronî dike û diyar dike ku eger mêr hewl bide xwe bide efûkirin, divê civakî bibe.
Li Komara Domînîkê sê xwişkên Mîrabal 25ê Mijdara 1960an ji hêla hêzên dîktotar Rafael Turujillo ve bi awayekî hovane hatin kuştin. Wê ev komkujî qet neyê jibîrkirin, ji ber ku di hişê civakan de bi cih bûye û jin bi kûrahî pê birîndar bûne. Hîn jî ew birîn derman nebûne û kuştina jinan dewam dike. Tenê bi jiholêrakirina hişmendiya şerxwaz û kujer mirov dikare wan kuştinan bi dawî bike, birîna jinan û civakê baş bike. Her sal 25ê Mijdarê li ser esasê bîranîna her sê jinên têkoşer weke Têkoşîna li Dijî Tundiya li ser Jinan tê pêşwazîkirin.
Weke şoreşgerên jin ên di xeta apoyî de divê em têkoşîna xwe ya li dijî tundiya li ser jinan ya di şexsê Patrîa, Mînerva û Marîa ku weke sê xwişkên Mîrabal tên naskirin de ji her demê bêhtir xurt bikin. Ji bo dawî li hemû rengên şer û tundiyê were, mirovahî ji bin zexta desthilatdarî û koletiyê rizgar bibe divê em berxwedana xwe ya rêxistinkirî bilind bikin. Êdî wê ti jin tundiya li ser xwe weke ‘qeder’ê nebîne. Em weke şagirt û şervanên Sarayan li her deverê bi serwextbûna ‘azadiya jinan azadiya civakê ye’ erkên xwe yên dîrokî pêk tînin.
Rêber Apo rêya azadiyê heta dawiyê ji jinan re vekir. Bi fikir û îdeolojiya xwe vê rêyê ronî dike û diyar dike ku eger mêr hewl bide xwe bide efûkirin, divê civakî bibe. Rêbertî dibêje: “Mêrê dikuje çawa dikare bêje ku hez dikim? Ma yê hez dike dikare bikuje?”
Li ser vê hevok û pirsa rêber Apo pir fikirîm. Bi rastî mêr çawa dikare jina ku pêre dijî û dibêje ‘jê hez dikim’ dikuje? Ez dibêjim nexwe li vir xapandineke pir mezin heye. Hewce ye ku hemû jin vê bizanibin û lêgerîna xwe ya rast û heqîqî xurt bikin.
Jin bi minasebeta 25ê Mijdarê her sal li qadan bi çalakiyên cihêreng berteka xwe ya li hember tundiya li ser jinan nîşan didin. Ji bo rêxistinbûna xwe geş û gur bikin û li dijî zîhniyeta mêrperest parastina xwe xurt bikin, dengê xwe bilind dikin.
Em ê weke jinên kurd û yên Rojhilata Navîn li bin ala Tevgera Azadiya Jinan têkoşîna xwe bilind bikin, azadiya fizîkî ya rêber Apo pêk bînin. Em ê jinan ji koledariya 30 hezar salan xelas bikin û hişmendiya mêrê serwer bi temamî tune bikin. Dê jiyan di pêşengiya jinan de ava bibe; azadî, wekhevî û edalet wê hîmên esasî bin. Em ê di vê têkoşîn û berxwedana birûmet de israr bikin.
