Komeleya Lêkolîn û Pêşvebirina Çand, Huner û Zimanê Kurdî ya Sêwregê (ZIMAN-KURD) di meha tebaxa 2025an de li navçeya Sêwregê ya Rihayê bi awayekî fermî hatibû vekirin û rêveberiya xwe bijartibû. Komeleyê avahiya ku radestî wan hatibû kirin, sê meh bûn restore dikir û amade dikir. Komele dê sibehê (30yê mijdarê) avahiya xwe ji xizmeta ziman û çandê re bi merasîmekê veke.
Li Sêweregê cara ewil e ku komeleyeke çand, huner û zimanê kurdî tê vekirin. Li komeleyê bi zaravayên kurmancî û kirmanckî dê ders bên dayîn. Her wiha ji bilî ziman dê dersên piyano, gitar, wênexêzî û sînemayê jî bên dayîn.
Banga piştevaniya pirtûkan
Rêveberê Komeleya Lêkolîn û Pêşvebirina Çand, Huner û Zimanê Kurdî ya Sêwregê (ZIMAN-KURD) Mazlûm Dogan Taniş diyar kir ku Parlamenterê Rihayê Omer Ocalan û stranbêjên xwecihî tev li şahî ango merasîma vekirina avahiyê dibin. Mazlûm Dogan Taniş anî ziman ku pirtûkên wan Kurdî kêm in û ew dixwazin her kes ji bo wan pirtûkan bişînin û xwest her kes li ziman û çanda xwe derkeve û welatiyên Sêwregê biçin tev li ders û xebatên wan bibin.
