“Prosesê Aştî û Civata Demokratîke” 13 mengî ver bi keda Rayberê Şarê Kurdî Rêzdar Abdulah Ocalanî dest pêkerd. Di derbarê prosesî de nîqaşî bi heme germahîya xo verdewam kenê. Bêguman averşîyayîşê ke Bakûr û Rojawan de pêk yene, qederê nê prosesî dîyar kenê.
Rojhilatê Mîyanînî de tifaqê jeopolîtîkê estayeyî yew bi yew bedelyenê û newe ra awan benê. Nê bedelnayan herî baş Rêzdar Abdullah Ocalan vîneno û bi hemleyanê xo wazeno tay çîyan bibedelno û Rojhilatê Mîyanînî de demokrasî xurt bikero. Têgeyraya Azadîya Kurdan zî qabê demokratîkbîyayîşê Rojhilatê Mîyanînî gamanê tarîxîyan erzena û paştî dana Rayberê Şarê Kurdî.
Ser vengê Rayberê Şarê Kurdî Têgeyraya Azadîya Kurdan gamê zaf tarîxî yê ke joy hêvî nêkerdê eştî. La dewleta tirke hemay ke yew gamêka qiçkeke nêeşta. Bi destê komisyona ke awan kerda wext derbas kenê. Çimê herkesî raydo dewlete game bierzo la dewleta tirke hemay ke koyanê Kurdîstanî de operasyonan virazena û qabê operasyonanê xo rayanê neweyan virazena û qewetê xo yo leşkerî koyanê Kurdîstanî de zêde kena. Di heman rocan de qabê operasyonanê xo yê Başûr û Rojava wextê tezkereyê şerî meclîse de 3 serrî derg kena. Dewlete bi nê hewldananê xo bi awayêko provakatîf nizdî prosesî bena. Bi kilmî nê prosesî heta nika bi ked û sebrê Rêzdar Abdullah Ocalanî dewam kerdo û dewam keno.
Gamê PKK’yî
Rayedarê dewleta tirke qabê ke di aştîya xeza de rol û mîsyon giroto, zaf pesnanê xo danê. Vanê ke “Çekronayîş qabê HAMAS’î întîxar o”. Dewleta Îsralî tenê qabê agirbestî bi seyan girotê HAMAS verdayî. Rayedarê dewleta tirke hemay ke Îsraîlî rexne kenê û vanê Îsraîl qabê aştî game nêerzeno. La wexto ke babete bena kurdî vate û pratîkê rayedaranê dewleta tirke heme bedelyenê. Vanê wa kurdî çek ronê, teslîmê ma bibê, qalê estbîyayîşê xo û pawitişê xo nêkerê û qet çîk nêwazê, qetilkerdiş û çinêbîyayîşê xo qebûl bikerê.
Fina ke me heme zanê Têgeyraya Azadîya Kurdan tenê şer nêvindarna; kongreyê xo viraşt, PKK fesih kerd û vat ma stratejîya xo ya şerî ya vera dewleta tirke bedelnenê. Ma wazenê xoverdarîya xo bi sîyaset verdewam bikerîme. Qabê ke samîmîyetê xo nîşan bidê 30 gerîlayan çekê xo sotî. Pey ra 26ê citmenge de eşkera kerd ke qewetê xo yê Bakûrî rapey kaş kerdo. La dewleta tirke hemay ke derbarê qebûlkerdişê estbîyayîş û heqê herî rewayanê kurdan de yew game nêeşta. Polîtîkaya înkar û çinêkerdişî ra fek veranêdana.
Wezîfeyê komîsyonî
Komîsyona ke meclîse de awan kerda heta nika wextê xo tenê bi goştarî derbas kerdo. Hemay ke nêşîyê Îmralî û goştarîyê serek muzekerevan û pêşengê nê prosesî rêzdar Abdullah Ocalan goştarî nêkerdo. Bi ser de şîyayîşê Îmralî û goştarîkerdişê Rayberê Şarê Kurdî ke xo rê kerda babeta nîqaşî û hemay ke qabê pêvînayîşî game nêeşta. Loma bawerîya şarî bi komîsyone nêmenda û xebatanê komîsyonî fina xebatanê wext viyartişî vînenê. Hetê bînî ra hêrişê faşîstan ê vera Rêzdar Ocalanî zî roj bi roj zêde benê. Faşîstan dirûşmeyê dayikan ê meclîse û meşê civanan qabê azadîya Rêzdar Abdullah Ocalanî xo rê kerdî hêcet û pêlê hêrişanê xo zêde kerdî. Komîsyon û rayedarê dewleta tirke zî temaşe kenê.
Badê vengê Rayberê Şarê Kurdî Rêzdar Ocalanî, Têgeyraya Azadîya Kurdan di heme hemleyan û vateyanê xo de azadîya fîzîkî ya Rêzdar Abdullah Ocalanî arda ziwan û vatê ke hewcedarî bi bedelnayîşê qanûnan est a û gere bibedelyê û Rêzdar Abdullah Ocalan azad bibo. Heqê hêvî yo ke di sere de Bahçelî vatbî ma do bide, nika fina waştişêkê zef berzî pênase kenê.
Nuşte do hewteyo bîn dewam bikero…
