Ma kurdî şarêko xoverdayox ê, ma barê heme şaranê binî yanê cografyaya xo wedarenê û seba heqanê înan bedel û cehdanê zaf giranan danê. Ancî eke ser rîyê erdî de neheqîyêke misilmanan ra bêro kerdiş, ma vernîya heme kesî vera a nêheqîye de warzenê payanê xo ser û reaksîyon nîşan danê/nawnenê, yanê ma hem demokrat û hem zî ometperwer/ometparêz ê.  La çi heyfo cehda ke ma semedê omet û şaranê bînan danê ma semedê xo nêdanê, ma xo vîra kenê ke halê ma bi xo yê şaranê bînan ra xirabêr a. Heta nika vakurê Kurdîstanî de hîna yew statûyêkê ma çin o, reyna estbîyayîş, ziwan û nasnameyê ma qanunê bingeyînî  yê dewlete de nêno şinasnayîş, yanê ma hema nêeşkenê vera keyberê xo pak bikerê la ma şarê bînî rê vanê, ma vera keyberê şima pak bikerê.

Ez nêzana ma key û ça ra kewtê nê halî la ez baş zanena ke ma roc bi roc ziwan û dewaya (Kurdîstan) xo ra dûr kewenê. Enê wextanê peyênan de biney partîyê ke xora vanê ma kurd ê, semedê dewaya Fîlîstînî yewbînan reyde reqabet kenê la dewaya Kurdîstanî qet nêna vîrê ê hetê kurdan. Nê partîyan ra yew bi şew û roc her ca de vanê, dewaya Fîlîstînî dewaya ometî ya coka ra ganî ma paştîya şarê Fîlîstînî bikerê û vera zilmê Îsraîlî de vengê xo berz bikerê. Hetê bînî zî vano, Îsraîl dewletêka emperyalîst a û semedê ma û welatê ma zî xeterêko pîl o, aye semed ma vera xeterî de paştîya şarê Fîlîstînî bikerê.

Dinya de 22 dewletê ereban est ê, eke înan semedê Fîlîstînî nêeşkenê çîyêkî bikerê ma kurdî bincaran/bin ra nêeşkenê çîyêkî bikerê, çimkî halê ma yê Fîlîstînî ra xirabêr o. Yê  fîlîstînijan polîs û artêşa înan est ê, hikumet û parlamentoya înan est ê, ziwan û nasnameyê înan qedexe nîyê, bi kilmekî înan wayîrê dewlete yê û xora zaf îmkananê dewlete est ê. La yê ma (kurdan) ne yew dewlete ma est a, ne yew statûyê ma û ne zî yew artêşa ma yê fermî est a, coka ra seba ke ma bêwayîr ê ma nêeşkenê sewbînan kes û şaran ra wayîrtîye bikerê. Xora fîlîstînijan zî heta nika semedê ma (kurdan) û dewaya ma (Kurdîstan) çîyêk nêkerdo û ma eşkenê vajê ke înan hertim bi awayêko eşkera duşmenîya kurd û Kurdîstanî kerdê û hema zî kenê. Reyna dema ke tirkan Efrîn û bajaranê Rojawanî binê dagir kerde, Hamas û hetgiranê ci zerrîweşîya xo vatê.

La wirdî hetê sîyasî yê ke qaşo kurdî ma ra wazenê ke, ma paştîya duşmenê xo bikerê. Seke qet çi persê şarê ma çinêbê, seke ziwan û welatê ma bindest û qedexe nêbê, sîyasetkarê ma bi şew û roc seba fîlîstînijan vengê xo berz kenê. Reyna zaf cayanê vakurê Kurdîstanî de zî seba fîlîstînijan tewir tewir çalakîyan saz kenê/virazenê û nê çalakîyan de Îsraîlî şermezar û protesto kenê. Sîyasetkarê nê wirdî hetî hertim beyanatanê xo de vanê ganî Îsraîl destê (ca de) galeyanê xo vindero û Fîlîstînî terk bikero û inahawa ganî Neteweyê Yewbîyayeyî (NY) zî Fîlîstînî sey dewletêka xosere nas bikerî.

Hetê bînî ra nê wirdî hetê ke fîlîstînijan ra dewletêka xosere wazenê, eynî çîyî (dewlete), yan zî ma vajê statûyêk semedê şarê ke paştîya (kurdan) înan kenê û hêz danê înan nêwazenê. Wirdî hetê ke bi vengê/reyê kurdan nika parlamento de sîyaset kenê çi heyfo bi qasê ke dewaya Fîlîstînî wayîr vejîyenê, dewaya Kurdîstanî ra nêvejenê. Serek û endamê nê partîyan vanê ke “Kurdan rê dewlete lazim nîya. Tayê vanê xora ma pêro misilman ê (kurd, ereb, tirk) coka ra hewce nêkeno ke ma ometê xo vera kafiran de lete û bêhêz bikerê”. Heto bîn zî vano, “dewrê netewe dewletan xelasîya coka ra ganî ma çehd bikerê ke nê welatî (Tirkîya) bikerê dewletêka demokrate”. Bi kilm û kirdkî wirdî hetî zî xulamîye şar û ometê layiqê ma (kurdan) vînenê.

Raşta ci ganî ma vajê ke dagirkerdoxê Kurdîstanî yê ke bi se serran o gonîya kurdan rijnenê û heme heqanê kurdan yê xozayî binpay kenê zî meseleya kurdan û meseleya fîlîstînijan de sey nê hizban fikirîyenê. Yanê ê (dagirkerdox) zî seba Fîlîstînî dewletêka xosere wazenê û la semedê kurdan vanê ke şima do dewlete se bikerê, xora Tirkîya dewleta şima ya zî coka ra hewce nêkeno ke şima ometê ma lete bikerê. Helbet ma baş zanenê ke Tirkîya meseleya Fîlîstînî de semîmî nîya, çimkî eke raşta ci zî ê vera zilmî de bîyêne, înan Îsraîlî ra xirabêr nêardêne serê kurdan. Xora ma kurdî baş zanenê ke Tirkîya estbîyayîşê xo çinêbîyayîşê kurdan ser o awan kerdo la bi rastî ez nêzana çira partîyê ma zî nê meseleyan de sey dagirkerdoxê xo fikirîyenê?

Seke şima zî zanenê emser mîyanê kurdan û tirkan de prosesêkê neweyî yê aştîye dest pê kerdo la no nêno a mana ke ma do erc û dewaya xo erjan û bêqîmet bikerê. Beno ke semedê xatirê prosesî merdim tayê çîyan ra tawîz bido la nêbeno ke ma dewaya Fîlîstînî bikerê vernîya dewaya Kurdîstanî. Xora partîyê ke Kurdîstanî ra muhîmêr sewbîna dewayêka ci bibî wa xora nêvajê ez hizbêka kurd a. Ganî nêro vîrakerdiş ke nê şarî (kurdî) heta nika seba dewa û ziwanê xo, ancî seba felat û azadîya welatê xo bedelê zaf giranî dayî, coka ra ganî partî û sîyasetkarê ma zî goş bidê waştişanê şarê xo û fek dewayanê seke birayîya ometî û birayîya şaran ra verdê. Yan seke ma pêro zî zanenê bê şarî hizb û partî vengê, yê ke hêz danê hizb û partîyan û ancî yê ke partîyan wedarenê û ronayenê şar o. Ena ray eke partîyê ma zî xo sey temsîlkarê şarê kurdî vînenê ganî verê înan zî hertim Kurdîstanî ro bo û heme hêzê xo zî tena semedê kurd, kurdî û Kurdîstanî bikarbîyarê.