Nika di rojevê heme şaranê Tirkîya û partîyanê sîyasîyan de di çekûyî est ê; aştî û çareserî. Gelo aştî virazîyo, persgirêya kurde çareser bena ya persgirêya kurde çareser bibo aştî yena? Bêguman no girêdayê vate dayîşê ma yê nê çekûyan o.
Qabê ke ma bieşkê vateyêkê raştî bide nê çekûyan, hewce keno ke ma persgirêya kurde çîya raşt pênase bikerê. Ma heme zanê ke persgirêya kurde tenê persgirêya şerî/şîdetî nîya. Yanî fina ke rayedarê dewlete vanê tenê persgirêya “terorî û şerî” nîya. Wexto ke xoverdarîya kurdan çinê be û şer çinê be na persgirêke raynê bibî. Persgirêke bi estbîyayîşê xoverdarîya kurdan o çekdarî nêvirazîyaya ke bi qedîyayîşê xoverdarîya çekdare biqedîyo.
Xoverdarîya kurdan
Xoverdarîya kurdan xoverdarîya pawitişê estbîyayîşî ya. Xoverdarîya pawitişê estbîyayîşî ti cayan de çi kulturan de ti hiqûqan de nêbeno sedemê persgirêke û fina persgirêke pênase nêbena. La heke qarşî hêrişanê çinêkerdişî şar bêveng bimano û xoverdarîya xo ya pawitişî nêkero, o wext persgirêke est a û zaf gird a. Loma ma vanê ke persgirêka kurde kurdan ra û xoverdarîya kurdan ra nêqewemîyaya. Bi kilmî na persgirêke kurdan nêveta.
Hişmendîya qirkere
Persgirêka kurde qebûlnêkerdişê estbîyayîşê civaka kurd o. Qirkerdişo fizîkî û qirkerdişo sipê yo ke se serrîyo ser kurdan dewam keno. Yanî persgirêka kurde hişmendîya dewleta qirkere ra qewemîyaya. Eke çimeyê persgirêke hişmendiya dewlete bo, çareserî ke di bedelnayişê na hişmendîye de ya. Ya ke se serrî yo kurdanê neçaran bi desan xoverdarîyê çekdarî kerdê na hişmendîya. Ya ke PKK da awankerdiş, çeke na destê gêncanê kurdan û verê înan da koyanê Kurdîstanî na hişmendîya.
Loma bi çekronayîşê kurdan, bi fesihkerdişê PKK û rêxistina kurdan na persgirêke çareser nêbena û aştî zî nîna. Wa qet kes xo nêxapêno.
Vatişê Rayberî
Rayber Ocalan qabê bedelnayîşê na hişmendîya se serran şansêkê zaf gird û muhîmî dano dewlete. Rayber Ocalan bi zelalî dewlete ra vano; qabê çareserî û awankerdişê aştî ma hedre yê, gelo şimayê ke hedre yê na hişmendîya xo ya faşîst bibedelnê. Vano, heke şima na hişmendîya xo ya înkar û qirkere bibedelnê, hewcedarîya ma bi PKK û çekan nêmanena, ma eşkenê înan ra fek veradê. Ma qabê keyfê xo PKK awan nêkerda û çekî nêgirotê dest.
Estbîyayîşê kurdan
Zelalî û fedekarîya ke Rayber Ocalan qabê çareserî û aştî nîşan dano, mixabin ma dewlete de nêvînenê. Hemay ke rayedaranê dewlete nêvanê ma do na hişmendîya dewlet a înkarî û qirkere bibedelnê. Nêvanê ma wazenê kurdî û tirkî wayirê heman heqan bê û fina yewbînan bicuyê. Nêvanê ma do estbîyayîşê kurdan di makeqanûn de bi ca bikerê û îradeyê kurdan bişinasnê. Hemay ke nêvanê, do etyara pey kurdî no welat de bieşkê bi nasname, ziwan û kulturê xo bicuyê û bi serberzî bê ters û bêfikar vacê ma kurd ê…
Reftarê komîsyonî
Bedelnayîşî hetekê bînî ra verdê di na hişmendîya gemarine de ma israr vînenê. Ma raynê niyetê dek û dolaban vînenê. Rayberê Şarê Kurdî û serekmuzakerevan Rêzdar Ocalan hemay ke di bin şert û mercê tecrîdî de cuyeno. Komîsyono ke kaşo qabê çareserî û aştî awan bîyo, nêverdeno dayikê ma meclîs de bi kurdî qal bikerê, qabê ke kurdê Rojawanî nêbê wayirê heqî û statû çi destê înan ra yeno kenê. Hişmendîya xo ya înkarî û qirker a se seran wazenê Sûrîye de bi destê çeteyanê HTŞ’yî awan bikerê…
Wezîfeyê dewlete
Heke dewleta tirke bi awayêko raşt û zelal biwaştêne hişmendîya xo ya çimeyê persgirêkan a înkar û qirkere bibedelno, persgirêka kurde bi ray û raybazanê edalet, hiqûq û demokrasî çareser bikero, hewce be demildest Rayber Ocalan azad bikerdêne û dişmenîya kurdanê Rojawanî nêkerdêne û na hişmendîya xo ya înkar û qirkere ser Sûrîye ferz nêkerdêne.
Persgirêka kurde bi awanbîyayîşê PKK û xoverdarÎya çekdare dest pê nêkerdo û bi çinêbîyayîşê înan zî çareser nêbena. Ya ke bîya sedemê bi desan xoverdarîyanê çekdarîyan û awankerdişê PKK’yî na hişmendiya dewlet a înkarî û qirker a.
Heta na hişmendîye nêbedelîyo persgirêka kurde çareser nêbena, heta persgirêka kurde çareser nêbo aştî û aramî nêvirazyena.
