Naye ra 3 serran verî Mahsa Jîna Amînî ya 22 serre Îran de bi destê polîsê exlaqî yo ke kontrolê çîtike keno, ameye destbendkerdene. 3 rojan ra dima Amînî ameye qetilkerdene. Polîsê Îranî vat ke Amînî binê destbendkerdişî de krîzê qelbî ravîyarna, şîye nêweşxane û uca de dinyaya xo bedilnaye. Bêguman no vatişê polîsî duştê raştîye bî. Çike polîsî a destbend kerde, kute û wina qetil kerde. Yanî Dewleta Îranî yew cinîye seba ke çîtike nêeşte serê xo qetil kerde. Rejîmo kanperest, cinsîyetperest, qirker, nîjadperest û hêrişkar wina yo. Yew cinîye nê rejîmê qilêrinî de nêameye pawitene. Camêrdan mîyanê xo de kiştiş serûber kerd.
Rîpêşê rejîmî
Qetilkerdişê Jîna Amînî bêşik heme Îran de vengêko pîl vet. Hema hema 80 şaristan û bajarekan de çalakîyî virazîyayî. Nê çalakîyan de zî 17 merdimî kişîyayî. Serêbûtê Amînî ra dima Îran de her çî bedilîya. Êdî “rîpêşê” rejîmê mollayan kewt. Êdî heme şaranê Îranî dî ke nê rejîmê kanperest û xeripîyayî de aramîye û zerreweşîye çin a. Êdî her merdimî çax kerd ke no rejîm heqanê merdiman nêpaweno. Êdî eşkera bî ke nê rejîmê nîjadperestî de de “decadence” est o. Sey çopgehî boya giran a xirabe dano. Ne seba şaran ne seba bawerîyan ne zî seba nasnameyanê Îranî no rejîm êdî çareser nêbeno. No rejîm raverşîyayîş, demokrasî, edalet û azadîye nê, dişmenîye, kanperestîye, yewperestîye û serdestîye armanc keno. No rejîm merdimî rê zîndanan dîyarîye keno.
Dara okaluptusî
Ewro têgêrayîşê azadî yê cinîyan wayîrê têkoşînê Mahsa Jîna Amînî vejîno û xoverdayîşê aye raver beno. Têgêrayîşê azadîye maneno “dara okaluptusî”. Seke zanîyeno na dare vera her demserre deyax kena. Zimistan bibo, vewre bibo, şilîye bivaro, pûkeleke bêro, germo giran bo, se beno wa bibo têgêrayîşê cinîyan asteng nêkeno. Na seserre wina aseno ke do seserra şorişê cinîyan bibo. Pergalo pederşahî qerqele de yo û o do netîceya xoverdayîşê cinîyan de birijîyo. Xora seba demokrasîyê rastikênî ganî cinîyî azad bibê. Bê azadîya cinîyan ne demokrasî beno ne zî hemwelatîya têduşte bena. Na çarçewa de Şorişê Rojawanî zaf girîng o. Çike no şoriş eslê xo de şorişê cinîyan o. Ruhê Jîna Amînî mîyanê nê şorişî de ciwîyeno. Şorişê Rojawanî têna seba herêma Rojawanî nê, heme Rojhelatê Mîyanênî rê rayîrê azadîye akeno û pêro şaran rê îlham dano.
