Ewro Rojawan de gamanê devletebîyayîşî ra toximê ke ramitî ra zewî weraznenê. Nê semedî ra zî TC’yî sînorê Sûrîye de çeteyê xo ca kerdê û ver bi Kurdîstanê serbixoyî awan bikerê îlanê şerî kenê. Nê rojanê ke ma tira ravêrenê de yewîya Vaşûr û Rojawanî do pêk bêro. No zî TC’yî do hewna zaf biqahrno.
Bi aşmano qala aştîya TC û PKK’yî beno. PKK’yî gama xo ya sifteyine eşte. La TC’yî heta nika gamêka şênbere nêeşte û nêwazeno bierzo zî. Erdogan û dormeyê xo hewna vanê “Xeta ma ya sûre Rojawan o”. Ez texmîn kena ke Erdogan wazeno ke pîla xo ya qedîyaye, tikey bo zî şarj bikero û emrê xo derg bikero. Gelo şima bawer kenê emrê xo derg bikero? Ez bawer nêkena, çepi ci kilm keno. Pekî kurdî semedo ke bibê dewlete şert û ferzî çi yê? TC çira nêwazeno Kurdîstan awa bibo? Komîsyon de qiseykerdişê kurdî ra bêtehamulîye do çiqas aştî û aramî bîyaro?
Kurdî her hawa her wext aştî û aramî ra qal kenê û do bikerê zî. La çi heyf ke dinya de yê ke aştî û biratî wazenê hertim bi dek û dolaban yenê xapênayîş û raştê zilmê zaliman ameyê û yenê. Pekî sûc ê kamî yo? Goreyê mi sûc ê kesanê ke bêdewlet cuyenê, yanê yê ma yo. Semedêko bîn zî ke tikey kurdî hewna Erdoganî û yê bînan dima geyrenê ke pîla qedîyaye bileyê û şarê xo biroşê yo zî.
Eke dewleta kurdan bibîyêne do bir rehetî nîyameyêne xapênayîş û do goreyê xo çend qiseyê xo dewletan mîyan de bivatêne… Haa vatiş, goreyê ekonomîya dewlemendîya dewlete, an zî biaqilîye bo, hewna do cayê xo bivîno û sîyaset bikero… Yanî çîyê ke yê dewletan payan dano vindarnayîş ekonomî, edalet û sîyaseto biaqil o…
Gelo sîyasetmedaranê kurdan ê TC’yî xo TC û dinya de çiqas da qebûlkerdiş? Goreyê mi zafêrîya înan heta ke destê înan ra yeno zilmî ver de vindena, veng û waştişê kurdan qîrena û hetê şarê xo û şaran de vindena. Tikey zî, peyê boça pergalî de geyrenê ke gîyê înan ra zey kergan werdeke nukul bikerê… Belê, şarê ke pîla qedîyaye nêvînenê, siba tarîye de, do kor û kerr bigeyrê û bimanê… Sereyê înan do zey kerrayê ke lehî de gêr benê, lêr û gêr bibê…
Aştîya ke yena qalîkerdiş, goreyê mi paştîya kardî ser de ya. Çimkî tikey TCyijî nêwazenê aştî bivirazîyo, nêwazenê Kurdîstan awan bibo. Çimkî, werdo ke şerî ra leyenê do biqedîyo. Tersê nêleyenayîşî, mezgê înan vero şerî keno… Yanê eke çetetîya înan biqedîyo, nanê înan zî qedîyeno. Eke Kurdîstan awan po bibo, her hawayî do zafêrîya kurdîstanijan do agêro Kurdîstanî û TC de problemê karkerîye zaf berz bibo.
Semedo ke çetetîya înan bidomîyo, aştî de gamê şênberî nîyenê estiş. Bi hêrîşkerdişê Rojawanî wazenê ke çetetîye bidomîyo û belkî pîla xo tikey bo zî şarj bikerê ra hesabanê boykewteyan kenê. Nê semedî ra zî heta na game gamêke zî nêeştê. Çimkî nêwazenê kurdî bibê wayîrê dewletêka serbixo. Nêwazenê kurdî edaletê xo dinya de vila bikerê. Dewletebîyîşê kurdan ra zaf tersê. Tenê TC nê zafêrîya dewletanê dinya zî tersena. Zanê ke kurdî bibê dewlete do rewşa dinya bibo bihar, bibo gul û gulîstan û do dinya bibo Kurdîstan.
Pekî ferzê dewletebîyayîşî çi yê? Sifte bi ziwanê xo perwerde girewtiş o. Komîsyon de tehamulê qiseykerdişê kurdî nêkerdî, gelo şima bawer ê ke aştî pêk bêro? Ez bi no hawa bêhêvî ya. Heta ke dewleta kurdan nêbo do hewna sereyê torn û tornanê ma zî bidejo.
Şertêko bîn, ekonomî, rayiraberdişê şariştanan de tecrûbe yo. Nê semedî ra AKP’yî qayûm eşt û erzeno şariştanan. Nê semedî ra waşt ke kurdî nêbê wayîrê tecrûbeyî. Goreyê înan ger kurdî xo rayîra biberê, do Kurdîstanî awan bikerê û bibo dewletêka dinyaware.
Ewro Rojawan de gamanê devletebîyayîşî ra toximê ke ramitî ra zewî weraznenê. Nê semedî ra zî TC’yî sînorê Sûrîye de çeteyê xo ca kerdê û ver bi Kurdîstanê serbixoyî awan bikerê îlanê şerî kenê. Nê rojanê ke ma tira ravêrenê de yewîya Vaşûr û Rojawanî do pêk bêro. No zî TC’yî do hewna zaf biqahrno.
Her çi beno wa bibo eke Kurdîstan awan bibo, do bibo paytextê dinya.
