Dewleta tirke zere de vana ma way û biratîya kurd û tirkan qayim bikerê, la teber ra heta dest ra yeno dijminîya kurdan kena. Qabê ke kurdê Rojawanî nêbê wayîrê statû, çi dest ra yeno kena.
Fina ke yeno zanayene di pêşengîya Rêzdar Ocalanî de prosesê aştî û awankerdişê civaka demokratîke dest pê kerdo û verdewam keno. Rayedaranê dewleta tirke nê prosesî ra vat “prosesê qayimkerdişê way û biratîya şarê kurd û tirkî”. Qabê nê prosesî di meclîs de komîsyon awan bî û xebate keno.
Di destpêkê prosesî de Rêzdar Ocalanî çi vatbî yew bi yew ame ca. Kurdan gamê raxî eştî. PKK’yî xo fesih kerd û di şexsê 30 şervanan de vat ma hedreyê heme çekanê xo bisocnê.
Belê vateyî baş ê, awankerdişê komîsyonî ke zaf baş û muhîm o. Bi namekerdişê “qayimkerdişê way û biratîya şarê kurd û tirkî” ke zaf muhîm o. La kiryar û pratikê rayedaranê desthilatdarîya AKP’yî qet û qet ro gorê rihê nê prosesî û vateyanê înan nîyo.
Desthilatdarîya AKP’yî hema yew gamêka şênbere nêeşta. Bedelnayîşêkê qickekî ma di polîtîkaya înkar û çinêkerdişî de nêvînenê. Muxatab û pêşengê nê prosesî Rêzdar Ocalan hemay ke di binê tecrîdî de yo. Nêweşê giranî hemay ke di zîndanan de yê. Dayîkê kurdî hemay ke nêeşkenê ver komîsyonê meclîsî yo ke di nameyê ci de “pêkardişê aştî û way û biratî” est o de bi ziwanê xo kurdî qalbikerê. Êrişê dagirkerî û talankerî bê beyntar verdewam kenê.
Dewleta tirke qabê çinêkerdişê rêxistinbîyayîşê kurdan û çinêkerdişê xoserîya Rojawanî hêrişê Efrîn, Serêkanî û Girêspî kerd. Enê şaristanî dagir kerdî. Kurdî koçber kerdî, mal û milkê kurdan bi destê çeteyanê xo talan kerdî. Qabê çinêkerdişê tifaqê QSD û Koalîsyonî çi dest ra ame kerd. Qabê têkberdişê aborî û ewlehîya Rojawanî çi dest ra ame kerd. Qabê fitne bikero mîyanê şaranê Rojawanî ray û raybazê şerê taybetî yê herî xirab bikar ardî. Nika di zere de qaşo prosesê qayimkerdişê way û biratîya kurd û tirkan est o, la di dijminîya Rojawanî de çi bedelnayîşêk çin yo. Sîyasetê înan o dijminîya Rojawanî bi hema xirabîyanê xo verdewam keno. Seserre verî seyin dewleta xo Komara Tirkîya ser çinêkerdişê kurdan awan kerdbî, nika wazenê dîktatorîya çeteyanê HTŞ’yî ke ser çinêbîyayîşê kurdanê Rojawanî Sûrîye de awan bikerê.
Di Sûrîye de bi estbîyayîşê dîktatorîya vermendê çeteyanê DAÎŞ, EL Nusra, El Qaîde… HTŞ razî yo la bi estbîyayîşê kurdan, pergalo demokratîk û civata demokratîke razî nîya. Ameyoxê xo di Sûrîyeya demokratîke de û estbîyayîşê kurdan de nêvînenê, di Sûrîyeya dîktatorîya çeteyanê HTŞ’yî de û çinêbîyayîşê kurdan de vînenê. Yanî di Sûrîye de kurdan nêwazenê, HTŞ wazenê. Erdogan vano “ma bê şert û merc paştî danê HTŞ û Colanî”. Yanî qarşî kurdan HTŞ’yî dir tifaq virazenê. Tifaqê xo û HTŞ ser çinêkerdişê kurdan û çinêkerdişê xoserîya Rojawanî virazenê.
Qabê ke di bin kontrolê Fransa û Amerîka de werêameyîşê Rojawan û HTŞ’yî nêvirazîyo, nêverda rayedarê HTŞ’yî şêrê Parîs. Qabê ke qarşî Fransa û Amerîka, Rûsya bikewo dewre rayedarê HTŞ’yî erşawitî Rûsya. Bi şerto ke Rûsya dijminayîya Rojawanî bikero, vat ma wazenê Rûsya Sûrîye de bimano. Nikay ke dewleta tirke û HTŞ qarşî Rojawanî eşîran birêxistin kenê. Wazenê di bin nameyê eşîranê Sûrîye de hêrişê Rojawanî bikerê. Dewleta tirke vîna ke nê hemleyî bi ser nêkuwenê nika raynê dest bi gef zext û zordarî û hêrişan kerdo. Bi dronan hêrişê Bendawa Teşrînî kerd, ro Kobanê guleyî varnayî û merdimî qetil kerdî. Bi kilmî qabê çinêkerdişê kurdan û xoserîya Rojawanî dewleta tirke heta nika çi kerdo nikay ke heme çî bi zêdeyî kena.
Nika muxalefetê Tirkîya ke tede hewce keno ma heme nê persan desthilatdarîya AKP’yî ra bikerê. Heke şima wazenê kurdan dir werê bêrê û way û biratîya kurd û tirkan qayim bikerê, na dijminayîya kurdanê Rojawanî çi ya? Nê gefî, şantaj û dek û dolabê şima çi yê? Kurdanê zerreyî dir way û biratî, kurdanê teberî dir dijminîye seyin bena? Ya xayê şima di binê nameyê qayimkerdişê way û biratî de tasfîyekerdişê heme deskewteyanê kurdan ê?
Bi ser nê kirinan de Erdogan Gimgim de vano “Tirkîya û Sûrîye de garantorê kurdan ma yê”. Erdogan vano wa kurdî nêbê wayîrê statû, wa nêbê wayîrê xoserî, wa nasnameyê înan, estbîyayîşê înan nêro qebûl kerdiş. Wa hertim bindest bê, hêsîr û belengaz bê, bêwayîr bê û muhtacê ma bê. Ma çiqas destûr bidê wa endêk bieşkê nefes bigerê. Yanî vano wa hertim hêsîrê verê berê ma bê. Garantorîya ey yena ena mana.
Yo ke pergalê demokratîk ê Rojawanî red bikero û dîktatorîya HTŞ’yî ya ke dîktatorîya Esadî ra xirabêr a biwazo û qarşî qetlîamanê HTŞ’yî yê ser elewîyan û durzîyan bêveng bimano û paştî bido HTŞ’yî çi rayan nêbeno dostê şaran û nêbeno dostê kurdan.
Kurdî henî kurdê seserre verî nîyê, bi nê polîtîkayanê pûç û ercanan nînê xapênayiş. Ma zanê ke yo ke dijminê Rojawanî bo nêbeno way û birayê kurdan û nêbeno garantorê kurdan.
