Serra 2025 seba pêro Kurdîstan û Tirkîya xeylê balkêş a. Na serre xeylêk gamê avzelî erzîyayî. Rayberê Şarê Kurdî Abdullah Ocalanî konsepto newî viraşt û taktîkê têkoşînî bedilna. Hertim têkoşîn çekan reyde nê dîyeno. Tayê wextan formê têkoşînî vurîno. Merdimo ke hertim eynî formê têkoşînî de rî nano ser, dogmatîk o û raver nêşino. Beno ke sosyalîzmo reel yan klasik nê semedî ra raver nêşî. Mîsal Tirkîya de çepo sosyalîst hema zî metodanê 1970an şuxilneno. Hema zî qalê “xoserîye” keno. Çekuya xoserîye xeylê binîqaş a. Dinyaya ewroyêne ya lîberale de dewleta xosere mumkun nîya. Seke zanîyeno her welat de herikîyayîşê metayan est o. Çi dewlete vera nê herikîyayîşî nêeşkena vindero. Têna tayê dewletî eşkenê herikîyayîşî asteng bikerê. Mîsal Kuba wazena ke sosyalîzmê reelî bidomno, la raştê her tewr hêrişê neo-lîberalî yena. Tîya de ganî Kuba metodê newî bişuxilno. Eksê ci ambargo û tedayî do ekonomîya Kuba bixeripnê. Vera pêlê neo-lîberalî stratejîyo newî hewce keno.
Komelperestîye û dewletperestîye
Prosesê Aştîye û Komelê Demokratîkî de Têgêrayîşê Azadî yê Kurdan plan keno ke Tirkîya û Kurdîstan de cuya hempare awan bikero. Yanî heme şar, bawerî û kulturî pîya biciwîyê. Têgêrayîşê Azadîye zano ke seserra XX. de netewe-dewleta hovî komel lete kerd, şarî qir kerdî û bawerîyî înkar kerdî. Na seserre de wazeno ke pergalo demokratîk û komelperest bêro awankerdene. Hukmatê tirkan zî tayê plananê binkoran keno. Seba îqtîdarî pawitişê estîya netewe-dewlete her çî ra muhîmêr o. Coka her gama xo de komelperestîye nê, “dewletperestîye” est a. Wina aseno ke dewleta tirke Rojhelatê Mîyanênî de hemverê Îsraîlî şerê serdestîye kena û nêwazena ke mîyanê kurdan û Îsraîlî de têkilîyê nêzdîyî bivirazîyê. Tirkîya çax kena ke Îsraîlî de armancê viraştişê “Korîdorê Dawudî” est o, coka vera nê korîdorî ruhê “Mîsak-i Mîllî” gandar kena.
Mewlewî û bektaşî
Çarçewaya Prosesê Aştîye û Komelê Demokratîkî de seke zanîyeno binê serbanê parlamentoyî de “komîsyon” ronîya. Heta nika komîsyonî kombîyayîşî kerdî. Tayê meseleyî ameyî nîqaşkerdene û beno ke demê ameyoxî de tayê serûberkerdişê qanûnî bibê. Bêşik xebata komîsyonî girîng a. La pozîsyonê hukmatê Erdoganî zêde zelal nîyo. Hetêk ra komîsyon de behsê demokrasî, edalet û huqûqî kenê, hetekê bînî ra Rojawan de nêwazenê ke kurdî wayîrê statuyêkî bibê. Bi hetkarîye û tesîrê Tirkîya HTŞ hêrişê herêma Rojawanî keno, Serekkomarê Sûrîye Ahmed Şara goreyê fermanê Anqara têgêreno û hemverê statuyê Rojawanî polîtîkaya netewe-dewlete ano ca. Xora Tirkîya hertim qalê temamîya erdî yê Sûrîye kena û wazena ke uca de zî netewe-dewlete bibo. Coka vajîyeno ke peyê qetlîyamê ke vera elewî û durzîyan virazîyayî de destê hukmatê Anqara est o. Nê konteksî de Wezîrê Karanê Teberî Hakan Fîdan kurdan rê gefan waneno û ferman dano hukmatê Şarayî. Hedefê Tirkîya astengkerdişê “federalîzmî” yo. Ma vînenê ke Bakur de dewleta tirke rolê “mewlewî” kay kena, Rojawan de zî rolê bînî yanî rolê “bektaşî” kay kena. Na polîtîka ameyoxêkê azad û têduştî rê zerar dana.
