Kesanê ke beşdarê nê vîrardişî bîyê, înan ra Abdulsamed Bîlgîn, Zahît Çîftkuran û Onder Teyfûr rojnameyê ma rê qalî kerd.
Tornê Şêx Seîdî û Hemşaraderê Şaraderîya Pîranî yê verênî Abdulsamet Bîlgînî dîyar kerd ke ewro seserrîya hereketê Şêx Şeîd efendî û embazanê ey qedîyaye. Yew seserre vîyarte û ma rihê înan rê serrgêra vîrardişî viraşte û wina vat: “Nê vîrardişê Kurdîstanî de tena nê, heme cayê dinya de ame kerdiş. No serewedartişê Şêx Seîdî Pîran de keyeyê bawkalê mi de dest pêkerd, Bawkalê mi zî birayê Şêx Seîdî yo û tewr şenikê înan Şêx Evdirehîm o. Ez zî tornê ey a. Ez 2014 û 2017î de hemşaredarê Şaraderîya Pîranî bîya dewlete seba nê tarîxî waşt ke mi terbiye bikera. Ez eşkena behsê meseleyêk bikera ke mi ser o ra vîyarta. No hedîse 13ê sibata 1925î de qewimîya û 13ê sibata 2017î de qeyûm tayînê şaraderîya Pîranî bi û ez gure ra ameya girewtene û mehkemaya mi zî 29ê hezîrane de yanî tarîxo ke Şêx Seîd ame dardekerdene, eynî tarîxî de virazîyaye.”
Bîlgînî wina dewam kerd: “Nê tarîxî tesaduf nêyî, dewlete yew plan û proje reyde nê tarîxan ana ma ver û wazena ke ma wina terbîye bikera. La no merhaleyo ke ma tedeyî yew proses dest pêkerdo û hêvîya ma est a ke no proses seba çareserîya komelê demokratîkî û aştî yew çîyo rind bibo.”
Ganî dewlete game bierza
Bîlgînî qiseykerdişê xo wina qedêna: “Bawerîya ma est a ke heq, edalet û hiqûq virazîyo. Serra 1925î ra tepişe ê yê ke şehîdê Kurdîstanî ma înan newe ra xo vîr anê. Ma wazenê ke dewlete seba çareserîya komelê demokratikî yew game bierza û ê yê teberî ra surgun de yê, tepa agêrê welatê xo. Ma reyna şehîdanê xo anê xo vîrî û vîrardişê şehîdanê ma vîrardişê heme şaran o.”
Ganî her dem tifaqê kurdan bidomîyo
Mele Zahît Çîftkuranî îfade kerd ke ewro seserîya Şêx Seîd û embazanê ey a û şarê Amedî ê xo vîra nêkerdî, rihê înan, têkoşînê înan ard xo vîrî û ma bawer kenê ke şar do her wext înan bîyaro xo vîr û înan yad biker o. Çîftkuranî wina domna: “Hereketê Şêx Seîdî bi temamî emsalê hereketê kurdan o û kurdî zî hêzê xo nê mîrasî ra gênê. Hereketê Şêx Seîdî û hereketê ewroyîn de ciwanê ke koyan de şerê têkoşînê azadî danê, qet yewbînan ra ferqê înan çinî yo û heme yê Kurdîstanî yê. Hereketê Dêrsimî, Koçgîrê, Zîlanî pêro tarîxê kurdan ê. Ma bi munasebetê na roje heme şehîdanê xo anê xo vîr û ma înan xo vîr ra nêkenê.”
Welatij Onderî dîyar kerd ke xoverdayîşê Şêx Seîdî û embazanê ey pîroz o û reya verêne serewedartişê Şêx Seîdî vernîya kurdan akerde û ewro zî no mîras dewam keno. Onderî wina vat. “Şêx Seîdî waşt ke ziwanê, kultur û edetê kurdan vîndî nêbê. Serewedartişê Şêx Seîdî tena herêmêke reyde sînorkerde nêbi, Kurdîstanî bi. Şêx Seîdî waşt ke çar leteyê Kurdîstanî pêro bibê yew û semedê nê xo feda kerd. Şar nika Şêx Seîdî zerrî ra xo vîr ano. Tornê Şêx Seîdî wazenê ke cayê mezelê Şêx Seîdî bander bibê û dewlet ra hesab bipirsê. No waştiş tena waştişê tornanê ey nîyo waştişê heme kurdan o. Ma newe ra şehîdanê xo yad kenê û ma înan xo vîra nêkenê.”
