Bi çarçeweya vengdayîşê “Haştîye û Komelê Demokratîkî” yê Rayberê Şarê Kurdî Abdullah Ocalanî û nêzdîbiyayena dewlete û partîyanê sîyasîyan ser ma fikrê welatijan pers kerd. Derheqê pirosesê neweyî de hemwelatijanê Amedî Medenî Alpkaya, Zulfî Dîcle û Bîlal Karaslan rojnameyê marê qiseyî kerd.

‘Kelecan û hêvîya girde virazîye’

Medenî Alpkaya wina va: “Sebake Rayberê PKK’yî Abdullah Ocalanî 27ê sibate de pê yew deklerasyonî reyde yew vengdayîş kerd û ma heme kesanra seba çareserîya aştî û komela demokratîke kelecan û hêvîya girde virazîye.”

Medenî Alpkayayî wina domna: “Seba nê demê înşakerdişê aştî û komelê demokratîkî ganî bi heme sazî û dezgeyê demokratîkî, rêxistin û komelê sîvîlî bi temamî goreyê felsefeyê pirosesê neweyî xo rêxistinî bikerê û xo newera awan bikerê.”

‘AKP’yî sozî dayî û nê sozê xo nêardî ca’

Welatij Zulfî Dîcleyî zî vat: “Rojhelatê Mîyanênî de hêzê serdestî wazenê ke dîzaynê de newe bikerê û Tirkîya zî înan rê hemparîye biker o. Tirkîya zî wazena ke xeyalanê xo yê emperyalan bîyaro ca. Tirkîya wazena Rojhelatê Mîyanênî de hêzê zê Rûsya, Îran û Natoyî reyde şantaj bikero û polîkaya xo ya qirêjine bido ramitene. Labelê na saxade mudaxeleyê Îsraîlî est o.”

Zulfî Dîcleyî wina domna: “Na saxa de hêzanê zê Hamas û Hîzbûlahî darbeyê girdî girotî. Piroseso newe seba xo vurnayîşê Tirkîya yew firsetêko girdo. Tirkîya çi wext tenge de bimano Kurdan de pêvênayîş kena. Birêz Abdullah Ocalanî seba ke biryarê feskerdişê PKK girot û Tirkîya zî seba gameştişanê demokratîkan sozî dayî hema nêardî ca. Birêz Abdullah Ocalanî 27ê sibatî de yew vengdayîş deklere kerd û pêvajoyo newe destpê kerd. Nê warî de MHP û AKP seba nê pêvajoyî ra hema zî ziwanê xo yê jahrinî gurênenê. Bi nameyê ‘qedênayîşê terorî’ ra heyana ewro 18 hanzarî hêrîşê hewayî kerdê.”

‘Tirkîya hema zî rewşa Rojawanî pawena’

Zulfî Dîcle vatena xo wina qedênê: “Sewbîna zî nêweşê hepisî veranêdayî. AKP bi rewşa esasî ra ravêrayîşê Rojawanî takîp kena. Hema zî polîtakaya xo ya qilêrine de israr kena. Hîna rewşa Îranî zî dîyar nêbîya û dewletê emperyalî wazenê ke, Tirkîya daxîlê şerî bikerê û seba amacanê xo bigurênê. Seba nê pirosesê neweyî û paragdîgmaya Birêz Ocalanî ser tayê partîyê nêjadperestî est ê û hema zî nêwazenê ke paragdîgmaya birêz Ocalanî bêyro fambîyayîş. Nê warî de tewş û tewş politikaya xo ya qirêjine gurênenê. Ganî şarê kurd zî nê partîyanê nîjadperestan teşhîr bikerê û bertekanê xo bişixulnê.”

‘Serkewtişê Rojawanî serkewtişê heme şaran o’

Welatij Bîlal Karaslanî zî rojnameya ma rê qisey kerd û seba nê prosesê neweyî fikrê xo va ke, No piroseso newe ganî heme hetîra bêro famkerdiş. Nê warî de bi verênî ra emperyalî wazenê ke Rojhelatê Mîyanênî newera dîzayene bikerê. Nê warî de zî birêz Abdullah Ocalanî Rojhelatê Mîyanênî de vera emperyalan ra serkewtişê heme şaran esas girot. Naye ser Birêz Ocalanî sîyaseto demokratîk de israr keno û nê warî de rol û mîsyono gird giroto serê milê xo û gamê şênberî, muhîmî eştî.’

‘Birêz Ocalan Rayberîya çar leteyanê Kurdistanî kerde’

Karaslan wina domna: “Tewgera Azadîya Kurd nê 50 serrîyo ke têkoşîne danê û ewro zî saya na têkoşîne ra ameyo na merhale. Heyana ewro ravêrayîşê pêvajoyê astî û demokratik de Rojhelatê Mîyanênî de en zaf serkewtişê kurdan bîyo û serkewtişê heme şaran bîyo. Sewbîna tewr zî şarêke pîya nê hardan de ciwîyenê wertaxê netewê demokratîkî bîyê. No sebeb ra zî Birêz Abdullah Ocalanî heme çar leteyê kurdistanî de ravêrayîşê sîyasetî de rayberîye kerda û rê û rêbazê têkoşîne dîyar kerdê.”

‘Şoreşê Rojawanî şoreşê cinîyan o’

Karaslanî wina peynîya watena xo arde: “Bi serranê 2011 de 22ê aşma Temmûze de pêvênayîşê notanê Rayberî zaf muhîmî bî û seba nê dayîşê têkoşîne de serkewtişî muhîmî virazîyayî. Rojawa de xoverodayîşê girdî û muqadesî virazîyayî. Xoverdayîşê soreşê Rojawanî vera çeteyanê DAİŞ’î de qahremanîyê dîrokî virazîyayî. Nê warî de vera NATO’yî û mutefîkanê NATO’yî payra mendî û rayîrê weçîneteya xo viraşti. Ravêrayîşê Şoreşê Rojawanî de warê ekolojî û azadbîyîşê cinîyan rewşa rihê şoreşî virazîye. Nê warî de dinyade zî şoreşî virazîyayî la hewayê şoreşê Rojawanî de cinîyan handê rol û mîsyon nêgirot bî. Rojawa de bi esas şoreşê xelesyayîşê zîhnîyetê cinîyan virazîya û şoreşê Rojawanî heme dinya qebul kerd.”