Li gorî nûçeya malpera lêkolîn.org MÎT, piştî hilweşîna rejîma Esed, di desthilata Şamê de ku ji hêla HTŞê ve hatiye damezrandin, xwe bi cih kiriye, niha di nav Firqeya 66emîn û 86emîn de hêzek taybet ava kiriye ku dê çalakiyên leşkerî û îstîxbaratî bimeşîne.
MÎT ê Serokên çeteyan ji Firqeya 66 û 86an ji bo avakirina hêzek taybet erkdar kiriye. Ji bo hêza taybet a ku dê were avakirin, bi berdêla 400 dolarî ji bo her kesî, dest bi çêkirina lîsteyek navan kiriye. Hat ragihandin ku kesên ku dê tevlî hêza taybet bibin, bi rêya perwerdehiya leşkerî û ewlehiyê ya dijwar di bin çavdêriya efserên Tirk de, ji bo mîsyonên îstîxbaratê yên kûr ên Sûriyeyê têne amadekirin.
Fermandarê Firqeya 66’em ê ku ji aliyê MÎTê ve hatiye tayînkirin, Ebu Îskender, serkêşiya çeteyên diziyê dikir ku mal û milkên xelkê li Efrîn didizîn.
Muhammed Cuma el-Cedan ku wekî “Ebu Iskender” tê nasîn û ji eşîra Begara ya gundewarê Dêra Zorê ye, di sala 2011an de tevlî refên “Artêşa Azad a Sûriyeyê” bû. Dema ku di nav çeteyên OSO de bû, li Hesekê beşdarî şerên li dijî HSDê bû. Piştre çû gundewarê Helebê û tevlî koma çete ya “El-Emşat” bû ku ew jî di bin kontrola MÎTê de bû û di sala 2018an de beşdarî dagirkirina Efrîn bû.
Li gorî agahiyên ku bi dest xistine, di wê demê de ji aliyê MÎT’ê ve hatiye perwerdekirin û serkêşiya komeke çete ya herêmî kiriye ku li Efrîn êrîşên talan û diziyê pêk dianîn. Bi berfirehbûna dagirkeriya Tirkiyê li bakurê Sûriyê, ji aliyê Wezareta Parastinê ve, ku rasterast bi hikûmeta demkî ya Şamê ve girêdayî ye, wekî fermandarê Firqeya 66emîn hate tayînkirin. Îro, ew li dora Ebû Kemalê, nêzîkî sînorê Sûriye-Iraqê, bi cih bûye.
Fîrqeya 86an ji aliyê “Ebû Hatim Şeqra” yê destxwîn-xwînxwar ve tê birêvebirin ku bi eslê xwe ji gundê Şuqeyra yê Dêra Zorê ye. Berî ku were tayînkirin bo Fîrqeya 86emîn, Şewra beşek ji koma çete ya “Ehrar el-Şerqiye” ya di bin kontrola MÎTê de bû. Piştre, wekî efserê-berpirsiyarê qadê yê MÎTê, ew tevlî Şaxê Duyemîn a Artêşê (Kolorduya Yekem) a girêdayê bi navê Artêşa Niştîmanî Suriyê (OSO) bû.
Wekî ku tê zanîn, Ebû Hatim Şeqra bi xwe di gelek komkujî û sûcên li dijî mirovahiyê de cih girtiye, di nav de kuştina siyasetmedara Kurd Hevrîn Xelef di 12ê Tîrmeha 2019an de heye. Her çend kuştina siyasetmedarê Kurd bertekek mezin a navneteweyî kişand jî sûcên şer ên nemirovane yên Şeqra û koma çete ya wî li Efrîn û Serêkaniyê bênavber berdewam kirin. Piştî bertekên tund, Wezareta Xezîneyê ya Dewletên Yekbûyî yên Amerîkayê di Tîrmeha 2021an de çeteya Ehrar el-Şerqiye û serokê wê Ebû Hatim Şekra ji ber binpêkirinên mafên mirovan ên cidî, bi taybetî kuştina siyasetmedara Kurd a Sûriyeyê Hevrîn Xelef, darvekirina sivîlan, revandin, îşkence û desteserkirina milkê taybet, li lîsteya mueyîdeyan zêde kir.
Tawanên şer ên ku ji hêla çeteya Ehrar el-Şerqiye û serokê wê Ebû Hatim Şeqra ve ku li ser navê DAIŞ û El-Nusrayê hatine damezrandin, hatine kirin, ji hêla rêxistinên wekî Neteweyên Yekbûyî û Rêxistina Efûyê ya Navneteweyî ve jî hatine belgekirin.
Malpera Lekolin.org di Dosyaya Taybet a 4ê Sibatê de tomarên qirêj ên Ebû Hatim Şekra û gelek serçeteyên din eşkere kiribû. Hêza taybet a ku ji aliyê MÎTê ve di nav Firqeyên 66emîn û 86emîn de hatiye damezrandin, ji dubarekirina sûc û binpêkirinên li Efrîn û Serêkaniyê hatine kirin wêdetir tiştek nîne; lê vê carê bi formateke ewlehiyê ya nû û ji aliyê çeteyên ku rasterast ji aliyê MÎTê ve têne birêvebirin ve tê bicîhanîn. Serokên çeteyên ku bi kuştin, talan û sûîqestan ve tên naskirin, îro bi erkên fermî û di bin navê “Artêşa Neteweyî” de derdikevin ser dikê. Tiştê ku diqewime ne ji nû ve avakirin e, lê belê yekkirina amûrekê ye ku xizmetê ji berjewendiyên dewleta Tirk a dagirker re dike. Di vê navberê de, her çend giliyên sivîlan ên li ser binpêkirinên berdewam zêde dibin jî, tu pirsek li ser berpirsiyariya hikûmeta demkî ya Sûriyeyê nayê kirin.
Di dawiyê de, careke din eşkere dibe ku êrîşên DAIŞê yên li ser hêzên HSDê li gundewarên Dêra Zorê yên zêde dibin, ji hêla çeteyên girêdayî dewleta Tirk a dagirker ve têne piştgirî kirin û ji hêla MÎTê ve têne fînanse kirin.
